Супрацоўнікі Google DeepMind патрабуюць адмяніць пажыццёвую забарону на крытыку кампаніі. Яны асцерагаюцца, што праз яе не могуць адкрыта казаць пра пагрозы ШІ.
Супрацоўнікі Google DeepMind патрабуюць адмяніць пажыццёвую забарону на крытыку кампаніі. Яны асцерагаюцца, што праз яе не могуць адкрыта казаць пра пагрозы ШІ.
Як высветліла The Washington Post, такія абмежаванні ўтрымліваюцца ў дамовах некаторых супрацоўнікаў лонданскага падраздзялення DeepMind. Выданне вывучыла адну з дамоваў і пагаварыла з двума дзеючымі супрацоўнікамі кампаніі на ўмовах ананімнасці.
«Гэтая тэхналогія мае вялікае значэнне і пры гэтым вельмі хутка мяняецца. Грамадства хоча і заслугоўвае ведаць пра яе рызыкі. І нярэдка менавіта ад супрацоўнікаў кампаній людзі могуць даведацца пра існуючыя і патэнцыяльныя небяспекі», — расказаў адзін з суразмоўцаў выдання.
Нядаўна дзясяткі супрацоўнікаў DeepMind абмеркавалі спрэчную ўмову ва ўнутраным карпаратыўным чаце. Некаторыя адкрыта раскрытыкавалі яго, а іншыя выкарысталі эмодзі з надпісам «1984» — адсылкай да антыўтопіі Джорджа Оруэла.
Абмеркаванне пачалося пасля заявы былой супрацоўніцы DeepMind Сафіі Лігуоры, якая публічна выступіла супраць распрацоўкі Google ваеннага ШІ. Яна расказала BBC, што свядома парушыла абмежаванні сваёй працоўнай дамовы. Пасля гэтага іншыя супрацоўнікі праверылі ўласныя дамовы і выявілі аналагічныя ўмовы.
Брытанскае заканадаўства абараняе інфарматараў, якія паведамляюць пра парушэнні ў грамадскіх інтарэсах. Адзін з супрацоўнікаў DeepMind сумняваецца, што пажыццёвую забарону на крытыку ўвогуле можна прымяніць у судзе. «Калі гэты пункт нельга забяспечыць юрыдычна, значыць, яго мэта — папросту запалохаць людзей», — заявіў ён.
У Google запэўнілі, што не прымяняюць забарону да былых супрацоўнікаў. Кампанія таксама змяніла ўмовы кантрактаў для новых работнікаў, выключыўшы з іх абмежаванні на крытыку пасля звальнення. «Мы заўсёды заахвочвалі адкрыты дыялог пра бяспеку і адказнасць», — заявіў прадстаўнік Google.
Аднак супрацоўнікаў гэтыя запэўненні не задаволілі. Яны патрабуюць цалкам выдаліць спрэчны пункт і з ужо заключаных дамоваў, каб атрымаць юрыдычныя гарантыі свабоды выказванняў.
У кастрычніку стала вядома, што некаторыя даследчыкі DeepMind звольніліся або збіраюцца сысці праз супрацоўніцтва Google з ваеннымі ЗША ды Ізраіля. Яны асцерагаюцца, што распрацаваныя імі тэхналогіі будуць выкарыстоўвацца ў баявых аперацыях.
Релоцировались? Теперь вы можете комментировать без верификации аккаунта.