У студзені сярэдні заробак у ІТ паменшаў — упершыню за апошнія паўгода

Паводле звестак Белстата, у студзені сярэдні заробак у ІТ (да выплаты падаткаў) склаў 7497,4 рубля. У параўнанні са студзенем 2024 года ён упаў амаль на 9%, адносна снежня 2024 года — на 22%.

Нагадаем, у снежні сярэдні заробак у ІТ стаў рэкордным за 5+ гадоў (9494,6 рубля) праз навагоднія прэміі, а таксама выплаты гадавых бонусаў. Многія кампаніі выплачваюць іх пры канцы года. Таксама на снежаньскіх заробках адбіўся рост курса долара. 

Між тым у студзені гэтыя фактары ўжо не ўплывалі на заробкі. Частка кампаній выплаціць гадавыя бонусы за 2024 год пазней (верагодна, у сакавіку). Акрамя таго, у студзені нязначна патаннеў долар. Калі па выніках снежня мінулага года курс амерыканскай валюты стаў рэкордным у 2024 годзе (3,4614), то ўжо па выніках мінулага месяца ён упаў да 3,4548. 

Таму пасля снежаньскага ўзлёту ўжо ў студзені сярэдні заробак вярнулася на ўзровень канца восені. Дарэчы, долар працягвае таннець, таму не выключана, што па выніках лютага сярэдні заробак айцішнікаў выявіцца яшчэ ніжэйшым.

У замежнай валюце сярэдні заробак у ІТ у студзені таксама рэзка ўпаў.

За мінулы месяц ён склаў 2170,1 долара (брута, па сярэднім курсе Нацбанка). У параўнанні са студзенем мінулага года ён скараціўся на 0,3%, адносна снежня 2024 года — на 20%. Студзеньскі заробак стаў найніжэйшым за апошнія паўгода.