Аддзел навін 27 лютага 2025, 15:22

Карыстальнікі Instagram паскардзіліся на наплыў траўмуючага шок-кантэнту ў рылсах

Сэрвіс кароткіх відэа Reels у Instagram пазапаўнялі публікацыі, якія траўмуюць псіхіку карыстальнікаў, піша Android Police. Раптам у іх стужках сталі вельмі часта з’яўляцца сцэны жорсткасці і гвалту, напрыклад, забойстваў, стральбы і нападаў з нажом, сэксуальны ды іншы кантэнт, які павінен фільтравацца.

1 каментарый

Сэрвіс кароткіх відэа Reels у Instagram пазапаўнялі публікацыі, якія траўмуюць псіхіку карыстальнікаў, піша Android Police. Раптам у іх стужках сталі вельмі часта з’яўляцца сцэны жорсткасці і гвалту, напрыклад, забойстваў, стральбы і нападаў з нажом, сэксуальны ды іншы кантэнт, які павінен фільтравацца.

Юзеры сталі заўважаць такія пасты днямі — яны ішлі са спецыяльнай паметкай, але не хаваліся. Прычым пасты ўсплывалі, нават калі паказ адчувальнага кантэнту абмежаваны ў наладах. На праблему скардзіліся карыстальнікі з розных краін свету.

Некаторыя юзеры выказалі здагадку, што мадэрацыя сацсеткі зладзіла страйк. У каментары Business Insider кампанія прызнала «памылку», праз якую карыстальнікам у рэкамендацыях трапляўся кантэнт, які не павінен быў, і сказала, што ўжо выправіла яе. Звычайна Meta выдаляе асабліва жорсткі кантэнт, а да некаторых пастоў дадае папярэджанне пра характар змесціва. Таксама ў яго абмежаваны доступ для карыстальнікаў малодшых за 18 гадоў.

Як адзначае выданне, на пачатку студзеня Meta вырашыла замяніць фактчэкераў на заўвагі, якія пакідаюцца карыстальнікамі, а ўсе партнёрствы па праверцы фактаў у ЗША будуць завершаныя ў сакавіку. Таксама кампанія мела намер «спрасціць» сваю кантэнтную палітыку і зняць абмежаванні на тэмы іміграцыі і гендару. У 2023 годзе BI пісаў, што недастатковая мадэрацыя кантэнту ў Meta і яе супрацоўніцтва з іншымі групамі для выяўлення дэзынфармацыі прывялі да распальвання гвалту ў М’янме, Іраку і Эфіопіі.

Між тым, паводле інфармацыі СМІ, Meta разглядае магчымасць вылучэння Reels у асобную праграму, каб канкураваць з TikTok.