Алеся Чапкевич world 26 мая 2026, 13:04

Ferrari прэзентавала першую цалкам электрычную мадэль — яе рыхтавалі разам з Джоні Айвам. Акцыі абрынуліся

Ferrari прадставіла ў Рыме першую ў сваёй гісторыі цалкам электрычную мадэль Ferrari Luce. Адразу пасля прэзентацыі акцыі аўтавытворцы ў Мілане абваліліся амаль на 8%. Прычына — разгромныя водгукі аналітыкаў і хваля хэйту ў сацсетках праз дызайн навінкі.

Пакінуць каментарый

Ferrari прадставіла ў Рыме першую ў сваёй гісторыі цалкам электрычную мадэль Ferrari Luce. Адразу пасля прэзентацыі акцыі аўтавытворцы ў Мілане абваліліся амаль на 8%. Прычына — разгромныя водгукі аналітыкаў і хваля хэйту ў сацсетках праз дызайн навінкі.

За выгляд суперкара за €550 тысяч ($640 тысяч) адказвала не ўласная каманда шэф-дызайнера маркі Флавіо Манцоні. Аблічча і інтэр’ер стваралі крэатыўнае агенцтва LoveFrom Джоні Айва і Марка Ньюсана — дуэт, які гадамі вызначаў выгляд iPhone, iPad і Apple Watch. Айв спрабаваў перанесці філасофію Apple на суперкар: прыбраў звычайную мускулістасць Ferrari, згладзіў усе вуглы і зрабіў акцэнт на мінімалізме і вялікай колькасці шкла — у кампаніі кузаў называюць «шкляным домам».

Рынак эксперымент не ацаніў. Эксперты ў адзін голас заявілі, што праз залізаныя формы Ferrari страціла сваю ідэнтычнасць і стала падобная на мас-маркет. Некаторыя назвалі машыну «сумессю Honda Accord EV і Tesla Model 3».

Сітуацыю пагаршае тое, што багатыя пакупнікі ўвогуле астылі да прэміяльных электракараў — яны баяцца, што батарэйныя машыны хутка губляюць у цане, у адрозненне ад класічных бензінавых суперкараў, якія з гадамі толькі даражэюць. Праз гэта Porsche і Lamborghini ўжо прытармазілі свае электрычныя планы.

Пры гэтым з тэхнічнага пункту гледжання Luce ёсць што прапанаваць:

4 электрарухавікі (па аднаму на кожнае кола) выдаюць эквівалент 1000 к. с.
Разгон да сотні за 2,5 секунды (гэта хутчэй, чым бензінавы крос-овер Ferrari Purosangue з рухавіком V12).
Максімальная хуткасць — больш за 310 км/г.
Упершыню ў гісторыі брэнда ў машыне з’явілася 5 паўнавартасных месцаў і велізарны багажнік на 600 літраў (туды ўлазяць тры чамаданы) — гэта стала магчымым толькі дзякуючы адмове ад грувасткага ДВЗ.

Яшчэ адна праблема — гук. Палова магіі Ferrari — гэта фірмовы рык рухавіка. Інжынеры ў Маранэла патрацілі 5 гадоў і накаталі 40 тысяч км па трэках, каб вырашыць гэтае пытанне. Яны не сталі сінтэзаваць фальшывы рык праз калонкі, а ўсталявалі датчык на заднюю вось: ён улоўлівае рэальны гул электрарухавікоў, апрацоўвае яго і транслюе ў салон.

Генеральны дырэктар Бенедэта Вінья спрабуе захаваць твар і заяўляе, што яны «адштурхоўваліся ад чалавека, а не ад электрычных тэхналогій». Кіраўніцтва запэўнівае, што эксклюзіўнасць не пацерпіць: Ferrari па-ранейшаму будзе выпускаць менш за 14 тысяч машын у год (для параўнання, Volkswagen робіць 9 млн) і трымаць кліентаў у шматгадовых лістах чакання, як гэта робяць Rolex і Hermès.

Але судзячы па першых водгуках, прадаць ультрабагатым фанатам «электрычны iPhone на колах» замест рыкаючага бензінавага баліда будзе значна складаней, чым здавалася Вінье і Айву.