«Я больш не праграміст»: Торвальдс расказаў, чаму перастаў пісаць код і за што крытыкуе ШІ
На саміце Open Source Summit India стваральнік Linux Лінус Торвальдс разам са сваім сябрам і оўпэнсорс-распрацоўшчыкам Дзіркам Хондэлем абмеркаваў сучаснасць і будучыню аперацыйнай сістэмы. Размова хутка перайшла ў асабістую плоскасць: Торвальдс прызнаўся, што ягоная роля ў праекце даўно змянілася, а таксама растлумачыў, чаму штучны інтэлект пакуль прыносіць распрацоўшчыкам ядра больш галаўнога болю, чым рэальнай карысці.
На саміце Open Source Summit India стваральнік Linux Лінус Торвальдс разам са сваім сябрам і оўпэнсорс-распрацоўшчыкам Дзіркам Хондэлем абмеркаваў сучаснасць і будучыню аперацыйнай сістэмы. Размова хутка перайшла ў асабістую плоскасць: Торвальдс прызнаўся, што ягоная роля ў праекце даўно змянілася, а таксама растлумачыў, чаму штучны інтэлект пакуль прыносіць распрацоўшчыкам ядра больш галаўнога болю, чым рэальнай карысці.
Канец эпохі праграмавання
Торвальдс больш не лічыць сябе праграмістам. Сёння ягоны працоўны дзень складаецца не з напісання кода, а з кіравання велізарнай супольнасцю. Ён прызнаўся, што амаль не чытае зыходны код — хіба толькі калі крытычныя збоі пры зліцці ветак вымушаюць яго да гэтага.
«Давайце будзем шчырыя. Я амаль не чытаю код. Я не праграміст, я кіраўнік распрацоўкі. Я ўсё яшчэ пішу код у тым сэнсе, што адпраўляю людзям патчы… але пры гэтым выразна даю зразумець: „Гэта проста прапанова, яна не правераная“. Я чакаю, што мэйнтэйнеры дашлюць мне ўжо гатовае выпраўленне. Так што сам я камічу свой код вельмі рэдка», — адзначыў ён.
Для Торвальдса цяпер нашмат важней бачыць агульную карціну праекта. Таму ён патрабуе ад распрацоўшчыкаў дасылаць пул-рэквесты з падрабязнымі і зразумелымі чалавечымі тлумачэннямі, каб разумець сутнасць змяненняў і логіку, якая за імі стаіць.
ШІ-галюцынацыі і горы лічбавага смецця
Дыскусія не абышлася без вялікіх моўных мадэляў. Торвальдс адразу з іроніяй адмовіўся ад сваіх ранейшых заяваў пра тое, што ШІ нібыта павышае прадукцыйнасць распрацоўшчыкаў у 10 разоў. Ён назваў гэту лічбу «узятай са столі». На ягоную думку, індустрыя толькі-толькі падыходзіць да моманту, калі ШІ пачынае прыносіць крыху больш карысці, чым шкоды, але да нядаўняга часу сітуацыя была адваротнай:
«Аж да пачатку гэтага года мы бачылі значна больш згенераванага LLM-смецця, чым карыснага кода. Вялікай праблемай сталі фальшывыя справаздачы пра памылкі. Вы атрымліваеце баг-рэпорт, які выглядае абсалютна пераканаўча, і людзі выдаюць масу сіл і часу, каб зразумець, што гэта проста галюцынацыя ШІ. Гэта каласальная страта чалавечых рэсурсаў».
«Так лепш»: Лінус Торвальдс пачаў вайбкадзіць і прызнаўся, што не ведае Python
Стваральнік Linux падкрэсліў, што супольнасць пачала фільтраваць такія справаздачы. Цяпер ад распрацоўшчыкаў патрабуюць не проста перакідваць згенераваны баг-рэпорт, а асабіста правяраць яго, прапаноўваць працоўны патч і выступаць жывым пасярэднікам паміж ШІ і ядром. Пераважную большасць аўтаматычных ШІ-рашэнняў Торвальдс назваў «бяздумнымі пластырамі», якія ліквідуюць сімптомы, але не лечаць саму архітэктурную памылку.
Вялікія глупствы і права на памылку
Тым не менш Торвальдс прызнае, што часам нейрасеткі знаходзяць сапраўды унікальныя і балючыя багі — напрыклад, уразлівасці бяспекі, якія заставаліся незаўважанымі дзесяцігоддзямі, а праз два дні пасля выяўлення ШІ ужо трапляюць на першыя палосы прафільных СМІ: «Я не з тых, хто забівае ганца, які прынёс дрэнныя навіны. Думаю, нам значна лепш ад таго, што LLM знаходзяць гэтыя багі, хай гэта і няёмка — бо мы павінны былі выявіць іх яшчэ гадоў дваццаць таму».
Сам Лінус выкарыстоўвае ШІ выключна для асабістых невялікіх праектаў у якасці інструмента для хуткага прататыпавання. Ён адзначае, што браць код адтуль у чыстым выглядзе нельга, але акрэсліць агульную канцэпцыю мадэлі яны дапамагаюць выдатна. Пры гэтым для сур’ёзных выпраўленняў на ўзроўні ядра аперацыйнай сістэмы нейрасеткі, паводле ягонага вопыту, пакуль катэгарычна не дацягваюць.
Релоцировались? Теперь вы можете комментировать без верификации аккаунта.