Алеся Чапкевич bel 2 верасня 2026, 13:12

ШІ прыносіць рэкордныя прыбыткі глабальнаму ІТ-вендару з беларускімі каранямі

Вытворца і дыстрыб’ютар ІТ-гаджэтаў ASBIS Group буйна выйграе ад ШІ-буму, піша тэлеграм-канал Вадзіма Сяховіча.

У пачатку 2026 года серверы для ШІ ды інфраструктура датацэнтраў (працэсары і аператыўная памяць для сервераў, ШІ-паскаральнікі, цвердацельныя назапашвальнікі, жорсткія дыскі ды іншыя прадукты), якімі гандлюе група, займалі другое месца і складалі 18,09% у структуры яе продажаў.

У першым квартале бягучага года на фоне далейшага росту попыту на ШІ доля сервераў і блокаў да іх (32,15%) у сукупных продажах ASBIS Group упершыню перавысіла рэалізацыю смартфонаў (31,9%).

Па выніках першага паўгоддзя разрыў паміж гэтымі прадуктовымі лінейкамі павялічыўся. На прадукцыю вядучых вытворцаў рашэнняў для ШІ-экасістэмы (Nvidia, Supermicro, Gigabyte, Asus, Intel Xeon, AMD EPYC і іншых) у структуры продажаў групы прыйшлося ўжо 38,15%, а на смартфоны — 31,4%.

Паводле справаздачы групы, продажы сервераў і серверных блокаў за першае паўгоддзе перавысілі $1,1 млрд і сталі галоўным фактарам рэкорднага росту ўсяго бізнесу сёлета.

Выручка ASBIS Group за перыяд вырасла на 75,9% да $2,9 млрд. Сёлета яна з пастаяннай перыядычнасцю фіксуе гістарычны прыбытак — як па выніках першага квартала, так і ў першым паўгоддзі. За шэсць месяцаў 2026 года ASBIS Group зарабіла $80,6 млн чыстага прыбытку — у 4,1 разы больш, чым у аналагічным перыядзе 2025 года.

ASBIS была заснавана ў 1990-х у Мінску беларускім бізнесменам Сяргеем Касцевічам і пастаўляла на мясцовы рынак замежныя ІТ-рашэнні. З 1995 года галаўны офіс ASBIS знаходзіцца на Кіпры. Летась група пазбавілася ад актываў у Беларусі.