Злоты ў НГ неўзапраўду пабіў рэкорды. Як рэагавалі айцішнікі

Замест феерверкаў Польшчу на гэты Новы год хваляваў курс злотага. Увечары 1 студзеня сэрвіс Google Фінансы паказаў небывалае паслабленне злотага адносна ўсіх валют. Курс долара, згодна з Google, дасягнуў 5,39 PLN, курс еўра — 5,94 PLN.

Гэта была памылка на баку крыніцы Google, іншыя рэсурсы дэманстравалі моцны злоты ў раёне 3,93 PLN за долар. Зранку 2 студзеня і Google прывёў курсы да нормы, але перапалох ноччу атрымаўся яшчэ той. Міністру фінансаў Анджэю Даманьскаму прыйшлося ў свята выходзіць у сацсеткі і супакойваць краіну:

— Спакойна. Курс злотага, які сее паніку, — гэта «фэйк» (памылка крыніцы даных). — Рынкі ў Азіі неўзабаве адкрыюцца, і сітуацыя вернецца да нормы.

У доказ міністр прадэманстраваў скрын з Bloomberg з нармальным курсам — 4,34 злотага за еўра. 

Але навагодні ілжэскачок, відаць, назаўжды застанецца ў гісторыі Google.

Чаты беларусаў у Польшчы тае ночы іскрыліся ад надзей і самаіроніі.

«Прызнавайцеся, хто загадаў долар па 5 у новым годзе?»

«Я ўжо плацеж па хаце закансэліў, калі заўтра такі курс будзе ў вайз, то выгада 50 баксаў».

«Прадам баксы па 4,5 zł. Спяшайцеся, Прапанова абмежавана. Пад раніцу па 5 будзе».

«Пайду заўтра пару кавалерак прыкуплю».

«Разыходзімся. Аватара не мяняем».

Навагодняя забаўка атрымалася, але, напраўду, шматлікім айцішнікам у Польшчы, чый заробак прывязаны да долара, не да жартаў. Паміж «эталонным» курсам 2022 года 5 злотых за долар і існым (3,9-4 злотых за долар) ужо больш за 20% розніцы.

Wanted. Шукаем айцішнікаў у Польшчы, чые зп прывязаныя да долара. Раскажыце, як вам жывецца пры курсе 3,9 злотага за долар і чаго вы чакаеце ад сваёй зп у 2024 годзе. Пішыце ў @devby_insight_bot, гэта ананімна.