Еўрастат апублікаваў статыстыку аб выдачы першасных дазволаў на пражыванне за 2024 год, у тым ліку па беларусах. Часцей за ўсё іх атрымлівалі ў першую чаргу людзі працаздольнага ўзросту.
Еўрастат апублікаваў статыстыку аб выдачы першасных дазволаў на пражыванне за 2024 год, у тым ліку па беларусах. Часцей за ўсё іх атрымлівалі ў першую чаргу людзі працаздольнага ўзросту.
Пад «першасным дазволам на пражыванне» Еўрастат разумее любы выдадзены ўпершыню дакумент, які дае права жыць у краіне ЕС даўжэй трох месяцаў запар. Гэта як ВНЖ, так і нацыянальныя доўгатэрміновыя візы (тыпу D), уключаючы гуманітарныя, працоўныя, навучальныя і іншыя. Не ўлічваецца ў лічбах часовая абарона, кароткатэрміновыя візы да 90 дзён і падаўжэнні/замены ўжо выдадзеных дакументаў.
У 2024 годзе беларусы атрымалі 174 790 першасных дазволаў на знаходжанне ў краінах ЕС. Гэта на 38% менш, чым у 2023-м — тады было 281 503. Больш за ўсё такіх дазволаў выдала Польшча — 151 116, і гэта на 41% менш, чым годам раней. На 2 месцы Літва (15 812, -2%), далей Германія (1411, -34%) і Іспанія (1404, +23%). Таксама ў працэнтах моцна дадалі Партугалія і Венгрыя, але на першыя чатыры краіны прыходзіцца больш за 97% усіх першасных дазволаў, якія беларусы атрымалі ў ЕС у 2024 годзе.
Калі казаць пра ўзрост, то з Беларусі ў Еўропу выязджаюць перш за ўсё працаздольныя людзі. Амаль 79% першасных дазволаў на пражыванне ў 2024 годзе былі выдадзены беларусам ва ўзросце 20-59 гадоў. Большасць — беларусам 30-39 гадоў.
Што тычыцца падстаў для атрымання дазволу, то ў цэлым па ЕС у 55% выпадкаў гэта праца, у 38% — «іншыя прычыны», у 4% — уз’яднанне з сям’ёй і ў — 3% вучоба. Але структура прычын моцна вагаецца ад краіны да краіны.
Паводле дадзеных Еўрастата, больш за ўсё першасных дазволаў беларусам было выдадзена ў 2022 годзе — 311 516. У 2021-м было 150 028, у 2020-м — 63 920. У суме за апошнія пяць гадоў атрымліваецца каля аднаго мільёна.
