Замовіць слот для падачы дакументаў на польскую візу праз сайт VFS Global амаль немагчыма. Праблема існуе ўжо многія гады і вядомая ўсім. На гэтым разквітнеў цёмны бізнес «памагатараў» — «доўга, дорага, без гарантый». Усе абнаўленні супраць ботаў, здаецца, толькі спрыялі ім.
Замовіць слот для падачы дакументаў на польскую візу праз сайт VFS Global амаль немагчыма. Праблема існуе ўжо многія гады і вядомая ўсім. На гэтым разквітнеў цёмны бізнес «памагатараў» — «доўга, дорага, без гарантый». Усе абнаўленні супраць ботаў, здаецца, толькі спрыялі ім.
Яшчэ на пачатку 2022 года мы пісалі, як IT-спецыялісты ловяць даты (і адначасова дэжа вю з 2010-х) і нават самі пішуць для гэтага скрыпты. Тады пасярэднікі ўжо абяцалі рэгістрацыю за 300–1400 BYN.
Пазней VFS Global абнавіў сістэму онлайн-рэгістрацыі, каб нібы адсекчы «памагатараў» — спачатку дадаў верыфікацыю праз МСІ, а потым і з дапамогай сэлфі. Але ўдзельнікі візава-дапаможных ланцугоў хутка адаптаваліся. Да 2026 года сітуацыя стала крытычнай — паспяховых самастойных рэгістрацый цяпер лічаныя выпадкі, калі яны ўвогуле бываюць. Навейшы дадатак таксама не дапамог.
Між грамадзянамі Беларусі і амбасадай іншай краіны спачатку «ўклініўся» пасярэднік-манапаліст — кампанія VFS Global індыйскага паходжання са штаб-кватэрай у ААЭ. Гэты прыватны пасярэднік перадае амбасадзе дакументы грамадзян з персанальнай інфармацыяй, уключна з пашпартамі, і бярэ плату за свае паслугі.
Гэта адбываецца не толькі ў Беларусі: да 2019 года VFS Global працавалі ўжо ў 147 з прыблізна 200 краін свету.
Але ў Беларусі ў вузкую прастору паміж грамадзянамі і прыватнымі візавымі цэнтрамі ўдалося ўлезці яшчэ адным пасярэднікам — агенцтвам-«памагатарам», якім цяпер трэба плаціць за «дапамогу» з запісам на падачу дакументаў на сайце візавага цэнтра.
За паслугу, якую на сайтах VFS Global і ў саміх пасярэднікаў прадстаўлена як элементарная, бяруць да 1000+ рублёў. Гэта палова медыянавага заробку па краіне.
Увесну 2026 года пра эпапею з самастойнымі спробамі запісацца на падачу дакументаў расказала карыстальніца Threads veron_baleron.
З верасня 2025 ейны хлопец прабаваў запісацца на падачу дакументаў для атрымання польскай рабочай візы. Даведаўшыся пра тарыфы пасярэднікаў (тыя самыя 1000–1100 рублёў), ён тры месяцы самастойна спрабаваў «злавіць» вольны слот на сайце VFS Global. Кожны раз падчас раздачы слотаў сайт працаваў нестабільна — «выкідваў» карыстальніка з сістэмы, не загружаўся ці проста пісаў, што вы знаходзіцеся ў чарзе. Часам нават не даваў увайсці ў профіль.
На званкі ў падтрымку і лісты ішлі стандартныя адказы «пачысціць кэш», «паспрабуйце іншы браўзер», якія не дапамагалі вырашыць праблему. Калі маладыя людзі накіравалі дасудовую прэтэнзію і прынеслі яе ў візавы цэнтр у сваім горадзе, дакумент не прынялі, прапанавалі адпраўляць у Мінск і наўпрост сказалі: «Падавайцеся праз пасярэднікаў».
Адказ на прэтэнзію прыйшоў у снежні 2025 года — у мінскім офісе VFS Global паабяцалі правесці ўнутраную праверку і запэўнілі, што з «памагатарамі» (у тэксце адказу «з пасярэднікамі і агентамі») кампанія не працуе.
Аднак гэта не дапамагло запісацца. Хлопцу veron_baleron усё ж давялося аплаціць «паслугі» «памагатараў», памяняць рэгістрацыю, прапісацца ў Берасцейскай вобласці — і толькі пасля гэтага ён змог аформіць польскую працоўную візу праз берасцейскі візавы цэнтр.
Акрамя неабходнасці плаціць за паслугу, якую пры нармальна працуючай працэдуры грамадзяне маглі б самі без цяжкасцяў аказваць сабе, veron_baleron абурыла тое, што 80% «памагатараў», да якіх яна звярталася, працавалі без падпісання дамовы і выдачы чэка за атрыманыя грошы. Дадаткова яны не давалі ніякіх гарантый.
У каментарах да паста veron_baleron карыстальнікі Threads дзеляцца падобнымі гісторыямі. Напрыклад, maryshabanova расказала, што ўжо сем месяцаў спрабуе злавіць акно для запісу на візу па запрашэнні, прынцыпова робіць гэта без дапамогі «пасярэднікаў» — і пакуль безвынікова. Некаторыя каментатары наўпрост называюць каранем праблемы менавіта «памагатараў».
Прачытўшы гісторыю хлопца veron_baleron, іншы карыстальнік Threads, lambotik, прасканаваў сайт VFS Global і выявіў шэраг праблем з бяспекай, зрабіўшы выснову: «Сайт надзвычай уразлівы».
Ягонае рэзюмэ:
«Сайт крывы. І тут відавочна ёсць зацікаўленыя з боку VFS. Я сутыкаўся з такой праблемай яшчэ ў 2021 годзе. Вырашаецца гэта вельмі проста — невялікай дапрацоўкай сайта, але каму гэта трэба? … Сумняюся, што хтось самастойна змог запісацца. 99% гэта схема, што працуе годамі».
Падазрэнні карыстальніка lambotik у тым, што нехта з супрацоўнікаў VFS Global можа быць зацікаўлены ў цяперашняй схеме з пасрэднікамі-«памагатарамі», добра карэлююць з назіраннямі veron_baleron. Як ужо згадвалася, дзяўчына і ейны хлопец сутыкнуліся з прамымі рэкамендацыямі карыстацца пасярэднікамі, калі спрабавалі падаваць дасудовую прэтэнзію ў візавы цэнтр VFS Global у сваім горадзе.
Вырашыць праблему з запісам на польскія візы спрабуюць і беларусы па той бок мяжы. Нядаўна ў сетцы з’явілася петыцыя ад імя жыхароў і працуючых у Польшчы грамадзян Беларусі да польскіх уладаў з просьбай палепшыць сістэму запісу на падачу дакументаў у польскія консульствы ў РБ. Яна сабрала 700+ подпісаў.
Аўтарка звароту, Юлія Карповіч, прапануе перастаць «корміць візавую мафію».
У тэксце петыцыі Юлія прапануе канкрэтнае рашэнне: «Патрабуем адключыць непрацуючую фота і пашпартную верыфікацыю і ўвесці мадэль паводле ўзору сістэмы ЗША: магчымасць выбару даты толькі пасля папярэдняй аплаты сервіснага/консульскага збора».
Юлія называе так парадак запісу на візіт у амбасады ЗША, з якім сутыкаюцца, напрыклад, заяўнікі ў Варшаве:
Па словах Юліі, даступныя даты візітаў у амбасаду ЗША ў Варшаве раскладзены адразу на два—тры месяцы наперад. Яна лічыць, што такая сістэма дазваляе пазбегнуць штучнага ажыятажу пры «выкідах» новых дат для запісу на наступны месяц.
devby папрасіў Юлію расказаць пра прычыны, якія падштурхнулі яе стварыць петыцыю:
— Мае сваякі праз гэта не могуць прыехаць да мяне ў госці. У мінулым годзе я аформіла ваяводаўскае запрашэнне сваёй залоўцы. І яна так і не змагла запісацца ў офісе VFS, нават з «памагатарам».
Сёлета я зрабіла запрашэнні для маці і бабулі. Ім за 60, таму нават не трэба запісвацца [на падачу дакументаў]. 29 красавіка яны паехалі з Маладзечна ў Мінск у офіс VFS і атрымалі адмову: у перадапошні дзень месяца пенсіянераў не прымаюць. 30 красавіка маці і бабуля зноў прыйшлі ў VFS і ўбачылі, што там ужо натоўп людзей каля 40 чалавек. А VFS увёў ліміт у 6–7 чалавек у дзень для гэтай катэгорыі заяўнікаў.
Людзі запісваюць спісы і прыязджаюць ужо, а 5–6 раніцы. Уявіце, гэта ж пенсіянеры, а не актыўная моладзь. Пры гэтым VFS замест таго, каб арганізаваць уласную чаргу, дробіць усіх у калідоры. Бабулі прыносяць раскладныя крэслы.
4 мая мая бабуля зноў паехала ў VFS, і яе зноў не прапусцілі — абмежаванне па колькасці і ўсё. А ў чарзе тыя ж самыя твары. У выніку мы зрабілі перапынак. Тым больш што маці, хоць і пенсіянерка, працуе і не можа ездзіць кожны дзень. Яна плануе ўзяць выхадны і прыйсці дзяжурыць з 6 раніцы, як робяць некаторыя іншыя.
Але мая сітуацыя — прыватны выпадак. Я працую Senior Dispatcher у кампаніі міжнародных перавозак. І нашы кіроўцы-беларусы таксама сутыкаюцца з праблемай запісу на падачу дакументаў. Па некалькі месяцаў сядзяць дома, мяняюць «памагатараў», нясуць ім грошы. Важна, што яны працуюць у Польшчы, але грошы трацяць у Беларусі — будуюць дамы, падтрымліваюць сем’і.
Сярод маіх калег ёсць тыя, хто можа аформіць ваяводскае запрашэнне для бацькоў малодшых за 60, пляменнікаў, братоў і сясцёр. Але ў цяперашніх умовах ім амаль немагчыма самастойна запісацца, каб прыехаць у госці да сваякоў на пару тыдняў.
Петыцыю я планую адправіць у польскі МЗС і тым, хто яго кантралюе. Таму што тое, што адбываецца, — катастрофа.
Беларусы — далёка не адзіныя, у каго ёсць прэтэнзіі да працы VFS Global.
У 2018 годзе журналісты і грамадскія арганізацыі Нігерыі расказалі пра шматлікія выпадкі меркаванага махлярства і неабгрунтаванага завышэння камісійных збораў з боку VFS Global для нігерыйскіх грамадзян.
У 2019 годзе кампанію завалілі скаргамі заяўнікі на брытанскія візы: пасрэднік абвінавачваўся ў «эксплуатацыі ўразлівых заяўнікаў дзеля прыбытку» і прымусе набываць прэміум-паслугі накшталт доступу ў «VIP-залы». У адказ прадстаўнік VFS заявіў, што дадатковыя паслугі «распрацаваны па запытах заяўнікаў для большага камфорту і персаналізацыі візавых сэрвісаў».
У маі 2024 года ў сацсетках з’явілася відэа, на якім шры-ланкійскі юрыст крытыкуе ўлады за перадачу выдачы турыстычных віз VFS Global у перапоўненым аэрапорце Бандаранаіке. Па паведамленнях СМІ, пасля 12-гадовай манаполіі на выдачу электронных віз кошты выраслі на $25–50, а для дзяцей да 12 гадоў бесплатныя візы скасавалі. Акрамя таго, у аэрапорце з’явіліся шматгадзінныя чэргі на прыём, які раней займаў некалькі хвілін.
У Турцыі апошнія гады многія жыхары жывуць скаргамі на немагчымасць самастойна запісацца на прыём у візавы цэнтр для падачы дакументаў на візы ў Нідэрланды, Францыю, Нарвегію, Балгарыю.
Пра ўцечкі асабістых даных кліентаў ідэю VFS Global ў маі 2024 распавёў папулярны брытанскі трэвэл-блогер Уіл Дэвіс на свайм YouTube-канале: пасля афармлення візы яму працягвалі прыходзіць лісты са звесткамі іншых турыстаў — поўнымі імёнамі, адрасамі і пашпартнымі звесткамі.
На міжнародным агрэгатары Trustpilot сярэдняя ацэнка VFS Global — 1,6/5 на падставе 1700+ водгукаў. Кліенты часта крытыкуюць цяжкасці з запісам, няўдобны сайт і няправільную інфармацыю. Апісваючы негатыўны досвед у розных краінах, некаторыя кліенты вінавацяць кампанію ў «выцягванні грошай» і празмерных, неабгрунтаваных тарыфах.
Тым часам серыял са «спрашчэннем» верыфікацыі для беларусаў працягваецца.
15 красавіка на беларускай старонцы VFS Global з’явілася папярэджанне: кампанія рэкамэндуе асцерагацца пасрэднікаў і махляроў і паведамляе, што з 1 красавіка ўведзеная спрошчаная працэдура верыфікацыі асобы для павышэння бяспекі і зручнасці рэгістрацыі.
Паводле паведамленняў у групах беларусаў, якія спрабуюць запісацца, сітуацыя з тых часоў амаль не змянілася.
devby двойчы, 31 сакавіка і 16 красавіка, звяртаўся ў МЗС Польшчы з просьбай пракаментаваць сітуацыю з падачай дакументаў на візы ў дыпламатычныя прадстаўніцтвы Польшчы ў Беларусі. Мы цікавіліся, ці плануюць польскія ўлады меры для вырашэння назапашаных праблем.
На жаль, адказаў мы так і не атрымалі.
Калі ў вас быў досвед (не)ўдалай рэгістрацыі на візу ў 2026 — падзяліцеся з намі ў боте, гэта ананімна.
Релоцировались? Теперь вы можете комментировать без верификации аккаунта.
Сдалась вам эта Польша....
Там не суть именно Польша. Это просто входные ворота в Европу, а дальше у каждого своё, от отдыха до работы, у некоторых транзит дальше.