А што я зрабіў? Маск здзіўляецца, адкуль столькі хейту да Tesla
У Tesla з’явілася яшчэ адна праблема, акрамя падзення продажаў і байкотаў: вандалы. На днях у інтэрв’ю Fox News Ілан Маск заявіў, што сітуацыя дасягнула такіх маштабаў, якіх ён ніколі не бачыў, хоць ні ён, ні кампанія «не зрабілі нічога дрэннага».
Гаворка ідзе пра ўсё часцейшыя напады на дылерскія цэнтры, зарадныя станцыі і электрамабілі Tesla ў ЗША. Гендырэктар абвінаваціў у гэтым левыя партыі і асудзіў зламыснікаў.
«Мяне па-сапраўднаму шакаваў узровень нянавісці і жорсткасці з боку левых», — сказаў Маск. Пасля таго як ён пачаў працаваць у Дэпартаменце эфектыўнасці ўрада, па ўсёй краіне прайшлі пратэсты з заклікамі не купляць машыны яго кампаніі. Гэтыя заклікі чуваць нават за акіянам — у Германіі і Уэльсе, адзначае Business Insider.
Удзельнікі руху «Tesla Takedown», што ўзнік у BlueSky — сацыяльнай сетцы-канкурэнце X Маска, — заклікаюць уладальнікаў Tesla прадаваць свае аўтамабілі і акцыі вытворцы, каб «як мага хутчэй спыніць Маска». Паводле інфармацыі на сайце ініцыятывы, за апошнія тыдні каля аўтасалонаў Tesla ў ЗША прайшлі дзясяткі акцый.
«Я заўсёды лічыў, што левыя — дэмакраты — павінны быць партыяй спачування, партыяй клопату. А яны падпальваюць машыны, кідаюць кактэйлі Молатава ў дылерскія цэнтры, абстрэльваюць іх, разбураюць аўтамабілі», — распавёў Маск.
«Мы мірная кампанія. Мы нікому не нашкодзілі», — дадаў ён.
Таксама мільярдэр без доказаў заявіў, што пратэсты і пагромы могуць быць часткай змовы супраць яго асабіста: «Хто гэта фінансуе, хто каардынуе? Таму што гэта нейкае вар’яцтва. Ніколі нічога падобнага не бачыў».
DOGE, якім кіруе Маск, спрабуе разабрацца з растратамі і карупцыяй у дзяржаўным апараце ЗША, паралельна звальняючы дзясяткі тысяч дзяржслужбоўцаў. Яго падначаленыя праводзяць праверкі ведамстваў і федэральных праграм. Маск не назваў канкрэтных устаноў, але заявіў, што некаторыя людзі атрымлівалі грошы незаконна, і гэтыя факты могуць быць звязаныя з кампаніяй супраць яго і Tesla. «Яны наогул хочуць мяне забіць, бо я змагаюся з гэтымі махлярамі, і імкнуцца нашкодзіць Tesla, бо [DOGE] змагаецца з велізарнай растратаю і карупцыяй у ўрадзе», — перакананы Маск.
«Я нікому не зрабіў нічога дрэннага», — канстатаваў мільярдэр.
Нядаўна за яго заступіўся іншы мільярдэр. Прэзідэнт ЗША Дональд Трамп заявіў, што атакі на дылерскія цэнтры Tesla будуць кваліфікавацца як тэрарызм, а хуліганам зладзяць «пекла».
Читать на dev.by