А1 у Беларусі аштрафавалі на буйную суму

Як адзначаецца, сума штрафу склала 83,7 млн рублёў, або каля 24 млн еўра. Штраф на беларускую «дачку» А1 Group быў накладзены за адміністрацыйнае правапарушэнне па выніках праверкі кампаніі. Але за якое менавіта «правапарушэнне» быў атрыманы штраф, у справаздачы не ўдакладняецца.

A1 Group толькі адзначае, што адміністрацыйнае правапарушэнне «не прычыніла шкоды ні дзяржаве, ні спажыўцам», але гэта не было ўлічана пры вынясенні рашэння пра штраф.

Паведамляецца, што кампанія падала тры апеляцыі. Але прынятае рашэнне пра накладанне штрафу засталося ў сіле. «Поўная сума ў памеры 83,7 млн рублёў (24 млн еўра) была налічаная ў чэрвені 2024 года, што беспасярэдне паменшыла вынік другога квартала і першага паўгоддзя», — паведамляецца ў справаздачы.

Накладанне штрафу, а таксама курсавыя ваганні негатыўна адбіліся на фінансавых паказчыках беларускай кампаніі. 

Агульная выручка кампаніі ў валюце за першае паўгоддзе ўпала амаль на 8% да 207 млн еўра. EBITDA (прыбытак да выліку працэнтаў, падаткаў і іншых выдаткаў) скарацілася на 32% да 69 млн еўра. 

У рублях выручка за паўгоддзе вырасла на 4,3%, EBITDA скарацілася на 23%.

У цэлым па групе кампаній беларускі тэлекамправайдар стаў чацвёртым па аб’ёме выручкі і толькі пятым па прыбытковасці.