Адміністрацыя ПВТ спыніла дзейнасць
Выглядае, што прызначэнне новага кіраўніка Парка фармальна ўвязанае вось з чым.
Дзяржаўная ўстанова «Адміністрацыя Парка высокіх тэхналогій» спыніла дзейнасць у выніку рэарганізацыі. Адпаведны запіс у АДР датаваны 3 жніўня 2023 года.
Замест адміністрацыі ключавой юрыдычнай асобай ПВТ цяпер з’яўляецца Дзяржаўная ўстанова «Сакратарыят Назіральнай рады Парка высокіх тэхналогій», якая была зарэгістраваная 1 чэрвеня 2023 года.
Уласна Сакратарыят Назіральнай рады ПВТ і ўзначаліў Аляксандр Базанаў.
Ранейшы кіраўнік Парка, Усевалад Янчэўскі, займаў пасаду дырэктара адміністрацыі ПВТ і, верагодна, фармальна страціў яе ў сувязі са спыненнем дзейнасці юрыдычнай асобы.
Экс-намеснікі Янчэўскага, Кірыл Залескі, Іван Жызнеўскі і Аляксандр Марцінкевіч, атрымалі новыя пасады — намеснікі начальніка Сакратарыята Назіральнай рады ПВТ.
Такая рэарганізацыя была прадугледжаная красавіцкім указам № 102. Дакументам было прадугледжанае з’яўленне ў структуры ПВТ кіруючай кампаніі, якая будзе займацца «інтэнсіўным стратэгічным развіццём». Але пра яе пакуль нічога не чуваць.
Таксама ва ўказе прапісанае стварэнне Сакратарыята Назіральнай рады ПВТ — для забеспячэння дзейнасці Назіральнай рады. Ключавая функцыя Назіральнай рады, нагадаем, прымаць у ПВТ новых рэзідэнтаў і выключаць старых. Адміністрацыя ж ПВТ, згодна з указам, рэарганізуецца «шляхам далучэння» да Назіральнай рады.
Асноўныя задачы Сакратарыята Назіральнай рады ПВТ:
- аналіз і ацэнка дзейнасці Парка высокіх тэхналогій;
- ажыццяўленне ўзаемадзеяння з кіруючай кампаніяй Парка высокіх тэхналогій;
- забеспячэнне дзейнасці Назіральнай рады;
- развіццё экспартаарыентаваных прадпрыемстваў, якія ажыццяўляюць распрацоўку праграмнага забеспячэння, вытворчасць тавараў і аказанне паслуг з выкарыстаннем новых і высокіх тэхналогій;
- развіццё спрыяльнага інвестыцыйнага клімату ў сферы новых і высокіх тэхналогій;
- працаўладкаванне спецыялістаў у сферы новых і высокіх тэхналогій, павышэнне эфектыўнасці іх дзейнасці;
- садзейнічанне кадраваму забеспячэнню інавацыйнага развіцця нацыянальнай эканомікі, развіццё адукацыі ў сферы інфармацыйна-камунікацыйных тэхналогій;
- фармаванне інстытуцыйнага асяроддзя, якое стымулюе інавацыйную дзейнасць, у тым ліку садзейнічанне развіццю стартап-руху;
- фінансаванне па ўзгадненні з Назіральнай радай мерапрыемстваў падтрымкі, развіцця і папулярызацыі адукацыі, адукацыйных мерапрыемстваў, рэалізацыі адукацыйных праграм у напрамках дзейнасці Парка высокіх тэхналогій за кошт сродкаў Сакратарыята і іншых крыніц у адпаведнасці з заканадаўствам;
- ажыццяўленне мерапрыемстваў, накіраваных на ўмацаванне дзелавой рэпутацыі Парка высокіх тэхналогій.
Такім чынам, у выніку выканання красавіцкага ўказа змянілася не толькі структура ПВТ, але і кіраўнік Парка.
Вось што вядома пра новага кіраўніка.
Читать на dev.by