Аднаму вярнулі $7000, другому прыйшлося даплаціць $7000+. Экстрэмальныя кейсы з падаткамі ў Польшчы

У Польшчы — сезон падачы дэкларацый і атрымання грошай ад падатковай. Беларусы выхваляюцца тэрмінамі і сумамі падатковых вяртанняў. Але бывае і наадварот: падатковая просіць даплаціць. Параўналі два кейсы беларускіх айцішнікаў у Польшчы.

Кейс першы. Амаль 27К вяртання за 2022 год

— Атрымаў такое вяртанне летась, — напісаў айцішнік. — Варшава, умова, а працэ. 

Нам з жонкай у 2022 годзе было менш за 26, плюс да гэтага жонка не працавала. Дэкларацыю мы падавалі разам. Думаю, гэта і паўплывала на вынік.

За год я зарабіў брута 350K ($88K), на працягу года з мяне ўтрымалі 46K ($11,5K) падаходнага. Потым з улікам жонкі мне зрабілі пераразлік і 27К ($6,8 K) вярнулі.

Чаму так шмат? Моладзь маладзейшая за 26 не плаціць падаходнага падатку на гадавы даход да 85 528 злотых ($21,4K). На дваіх гэта 171К выліку. Плюс у мяне ёсць аўтарскія льготы. Плюс у сярэдзіне 2022 года памянялі падатковую шкалу з 17/32% на 12/32%, таму быў пераразлік з 17->12%. Плюс у нас ёсць ільгота на інтэрнэт (што праўда, яна невялікая).

У 2021 годзе на дваіх з жонкай, якая тады таксама не працавала, вяртанне было блізу 11K злотых, але тады мой даход быў меншы, бо пераехалі мы не на пачатку года.

Сёлета дэкларацыі я яшчэ не падаваў і сумы вяртання не знаю. Нам з жонкай ужо 26+ гадоў, гэта паменшыць падатковую льготу. Але таксама ў нас нарадзілася дзіця, гэта крыху павялічыць яе. 

Кейс другі. За 2022 год даплаціў 28,5К, за 2023 просяць 15К

— Жыву і працую ў Польшчы ад 2016 года, атрымліваю аклад і квартальныя прэміі на ўмове, а працэ. За 2023 год я зарабіў 450К брута ($112K), жонка амаль не працавала, але, нягледзячы на гэта, я мушу даплаціць 15K ($3,8К) злотых.

Мы заўсёды падавалі адную дэкларацыю на дваіх, і заўсёды з мяне патрабавалі даплату. За 2022 год, калі жонка працавала, мы даплацілі больш за 28К ($7,1 K). За 2023 — 31К ($7,7 K). Нават у 2016 годзе, калі я быў маладзейшы за 26 гадоў, адпрацаваў няпоўныя 9 месяцаў + атрымліваў значна менш, мне давялося даплаціць блізу тысячы злотых (у 2016 годзе неабкладаны гадавы даход у Польшчы быў істотна ніжэйшы за цяперашнія 30 тысяч злотых, а стаўкі падаткаў — вышэйшыя. — dev.by).

Як я разумею, на працягу года працадаўца адымае не ўсе падаткі (напрыклад, я запаўняў заяву працадаўцу з просьбай паменшыць падатковыя авансы: у ім я дэклараваў намер даваць справаздачу аб даходах сумесна з жонкай і тое, што яна не прэтэндуе на такое ж памяншэнне авансаў), а па выніках года адбываецца пераразлік па стаўцы 32% (гадавы даход ад 30 да 120 тыс. злотых абкладаецца па стаўцы 12%, звыш 120 тыс. злотых — па стаўцы 32%. — dev.by). Здаецца, гэта стандартная практыка на ўмове, а працэ. У маім разуменні, вяртаюць падаткі толькі тым, у каго адносна нізкія даходы або хто нядоўга працаваў у каляндарным годзе.

Мне здаецца, у сітуацыі, калі даходы мужа і жонкі істотна адрозніваюцца, таму, у якога зп ніжэйшая, проста нявыгадна працаваць: значную частку заробку па выніках года прыйдзецца аддаць падатковай.

Ад dev.by. Пра заяву аб памяншэнні падатковых авансаў. Вяртанне падаткаў з 30 тыс. злотых не заўсёды адбываецца па выніках года — работнік можа напісаць заяву працадаўцу, і той будзе ўжываць падатковы вылік штомесяц, павялічваючы выплату на суму льготы (3600:12=360). Аднаразовага вяртання ў гэтым выпадку не будзе.

Мяркуючы з усяго, нашаму герою і яго жонцы на працягу года вярнулі нейкую суму авансу (магчыма, 3600×2=7200). Гэта паўплывала на выніковую суму даплаты. У адваротным выпадку падатковае вяртанне пры канцы года змякчыла б удар, даплаціць прыйшлося б эн мінус умоўныя 7200.