Айцішнік адказаў польскім палітыкам, якіх палохаюць праграмісты з Беларусі

Python-распрацоўшчык напісаў на Reddit адказ польскім дэпутатам, якіх хвалююць візы PBH і тое, дзе працуюць іх уладальнікі, ці не выконваюць выпадкова адчувальныя дзяржзаказы.

Ён нагадаў, пры якіх абставінах у 2020 годзе стартавала праграма PBH і што ў лік уладальнікаў віз уваходзяць не толькі айцішнікі, але таксама іх сужэнцы і дзеці. Некаторыя да Польшчы не даехалі, але большасць усё ж выкарыстала візы па прызначэнні. 

Распрацоўшчык запэўніў, што айцішнікі з Беларусі не хаваюцца, іх лёгка знайсці ў тэлеграм-чатах. А працуюць яны, як правіла, у польскіх аддзелах міжнародных карпарацый ці проста з заказчыкамі як ІП. Што да ўдзелу беларусаў у польскіх дзяржзаказах з доступам да дзяржсакрэтаў, наўрад ці ім гэта цікава — проста амерыканцы плацяць больш і ў іншай валюце.

А вось партрэт тыповага айцішніка з Беларусі: з вышэйшай адукацыяй, тактоўны, эмпатычны, клапоціцца пра сябе і навакольных, шануе закон. Часцяком ён не можа вярнуцца на радзіму праз палітычны пераслед, але па-ранейшаму яе вельмі любіць.

— Я таксама закахаўся ў Польшчу, яе культуру і людзей. У нас шмат агульнага, і мы не такія страшныя шпіёны, як пра нас думаюць, — рэзюмуе айцішнік.

<…>Я разумею, што Польшча ўступае ў новую палітычную эпоху і ёй трэба будзе пераадолець мноства праблем, але я хацеў бы запэўніць польскае грамадства, што беларускія ІТ-спецыялісты не ўваходзяць у лік гэтых праблем. Мы хочам жыць у міры, добра зарабляць і не дастаўляць непрыемнасцяў іншым. 

Рэакцыя супольнасці

Пост сабраў надзіва добрыя і смешныя каментары. Хтосьці папраўляе дробную памылку, але ў цэлым тэкст, здаецца, напісаны на дыхтоўнай польскай. Аўтару сама час здаваць экзамен на B2.  

І не толькі яму. Вось гэты камент ад айцішніка-беларуса таксама цягне на добры экзаменацыйны бал. Некалькі гадзін таму ён заплаціў столькі і столькі падаткаў і збораў у сацстрах. Не карыстаецца медпаслугамі па дзяржстрахоўцы і не стварае чэргаў, паважае палякаў, размаўляе па-польску. І так, ён беларус. Што не так?

Астатнія, спадзяемся, напісаныя палякамі.

— У нас працуе як мінімум 30 праграмістаў з Беларусі. Выдатныя супрацоўнікі; нават улічваючы, што некаторыя з іх маюць польскія карані, гэта, безумоўна, нацыя, якая інтэгруецца лепш за ўсіх.

— Побач са мной на працы калега з Беларусі — бэкэнд-спецыяліст. Усе хваляць яго працу, чувак норм, мы часта гутарым, бо моўнага бар’ера практычна няма.

— Хлопец з майго пакоя беларус, нешта там сабе кодзіць; 

— Я працаваў з некалькімі беларусамі, і ўсе яны былі добрымі людзьмі (анекдатычна, я ведаю). Яны шмат працавалі, добра інтэграваліся і размаўлялі па-польску. У нас у краіне ёсць месца для кожнага, і, вядома ж, для нашых братоў беларусаў і ўкраінцаў, якія ўжо шмат гадоў уносяць свой унёсак у дабрабыт польскага народа. Жадаю, каб аднойчы мы змаглі адплаціць вам і каб Польшча, Украіна і Беларусь жылі ў гармоніі і квітнелі разам.

Аптаметрысты (гэта не айцішнікі) таксама малайцы:

— Працаваў з беларускім аптаметрыстам. Вельмі надзейны хлопец, ветлівы і абыходлівы. Не ведаю, як астатнія, але калі ўсе такія, як гэты хлопец, я б рэкамендаваў 10 / 10.

І пра (не)ўдзел беларусаў у дзяржзаказах:

— Хацеў бы, каб беларусы зрабілі сучасны партал ZUS.

— Так польскія парталы сапраўды патрабуюць вялікіх змен, ZUS — толькі пачатак.

Увогуле, беларускім айцішнікам сама час заганарыцца, але яны ж яшчэ і сціплыя?

dev.by, як і іншым сумленным медыя, сёння вельмі складана: рэдакцыя працуе па-за межамі краіны, а нашыя рэкламныя даходы скараціліся ў некалькі разоў. Але мы даем рады — з вашай дапамогай. Гэта вы дзеліцеся з намі інфанагодамі, думкамі, досведам, часам, увагай і данатамі.

Праз Patreon. 

З Беларусі — праз Donorbox.

І яшчэ крыптой, тут кашалькі.

Дзякуй, што прачыталі гэтае паведамленне.