Айцішніка з Мінска будуць другі раз судзіць за данаты, яму пагражае да 15 гадоў

Новы судовы працэс пачнецца 29 лютага ў Мінскім гарадскім судзе. Паводле даных праваабаронцаў, праграміста будуць судзіць па двух артыкулах: фінансаванне экстрэмісцкай дзейнасці і фінансаванне тэрарыстычнай дзейнасці. Яму пагражае да 15 гадоў пазбаўлення волі.

У поле зроку сілавікоў праграміст трапіў у 2022 годзе. Яго затрымалі за данат у 0,2 эфіра (каля 800 долараў) у адзін з фондаў, прызнаных у Беларусі «экстрэмісцкім фармаваннем», і пазней прысудзілі да трох гадоў калоніі агульнага рэжыму.

Восенню мінулага года праграміста паказалі ў відэасюжэце дзяржканала АНТ. У сюжэце паведамлялася, што праграміст у якасці кампенсацыі за данаты абмяняў 31 біткойн і пералічыў сродкі на рахункі медустаноў. Тады адзін біткойн каштаваў больш за 26 тысяч долараў. Атрымлівалася, што агульная сума кампенсацыі магла перавысіць 800 тысяч долараў. Таксама паведамлялася, што айцішнік падаў хадайніцтва аб памілаванні і чакае рашэння.

Аднак ужо пасля вынясення прысуду сілавікі нібыта ўстанавілі дачыненне праграміста да яшчэ 5 крыптавалютных плацяжоў на адрас фондаў на 16 тысяч рублёў. Верагодна, новы суд звязаны з гэтымі данатамі.