Amazon атрымлівае камісію пры афармленні электронных віз у Расію
Для афармлення электронных віз у Расію выкарыстоўваецца эквайрынг ад Amazon, заўважыў Telegram-канал @ranarod. Плацяжы праходзяць праз кампанію, зарэгістраваную ў Аб’яднаных Арабскіх Эміратах.
1 жніўня ў Расіі запрацавала магчымасць афармлення электронных віз для грамадзян 55 краін. З усіх замежнікаў, старэйшых за 6 гадоў, спаганяецца збор у памеры $52. Для аплаты міжнароднымі картамі расійскі МЗС скарыстаўся замежным плацежным сэрвісам.
На апошняй старонцы анкеты трэба пацвердзіць згоду на аплату праз Amazon.
Пасля націскання кнопкі «Аплаціць» адбываецца пераадрасацыя на субдамен payment.gkdtravel.com. Гэта сайт кампаніі GKD Global FZE LLC, якая зарэгістраваная ў ААЭ і працуе ў сферы турызму.
GKD Global і Amazon Payment Services пазначаныя ў акне аплаты, якое адкрываецца на дамене payfort.com. Гэта сэрвіс апрацоўкі плацяжоў, які Amazon купіла ў 2017 годзе і пераназвала ў Amazon Payment Services.
Згодна са старонкай тарыфаў, з бізнэсу са штомесячным абаротам меншым за 300 тысяч дырхамаў ААЭ (каля $82 тысяч) Amazon бярэ за эквайрынг 2,8% + 1 дырхам з кожнай транзакцыі. Бізнэсу з вялікімі аб’ёмамі прапаноўваюцца асаблівыя ўмовы. Калі выказаць здагадку, што выкарыстоўваецца першы варыянт, то Amazon атрымаюць з кожнай аформленай візы ў Расію камісію ў памеры каля $2.
У сакавіку 2022 года Amazon прыпыніла дастаўку ў Расію і Беларусь, а таксама часова закрыла доступ да відэасэрвісу Prime Video для расійскіх карыстальнікаў і спыніла прымаць новых кліентаў воблачнага сховішча Amazon Web Service.
Читать на dev.by