Amazon заблакавала «разумны дом» інжынеру Microsoft за расісцкі каментар, якога не было

Джэксан жыве ў ЗША. Раптоўнае блакаванне пачалося ў маі на наступны дзень пасля таго, як ён атрымаў заказ з Amazon: у адзін цудоўны момант ён больш не змог узаемадзейнічаць з падключанымі да разумнага дома смарт-прыладамі. У асноўным усімі гаджатамі і аўтаматыкай ён кіруе праз галасавога асістэнта Alexa на разумных калонках Amazon Echo.

Джэксан звязаўся з тэхпадтрымкай Amazon, дзе яму сказалі, што ягоны акаўнт быў заблакаваны праз скаргу кур’ера на нібыта расісцкія каментары з яго боку.

Інжынер праверыў запісы са свайго смарт-званка і ўбачыў на іх кур’ера — той жа расы, што і ён сам. Выявілася, што той няправільна пачуў аўтаматычную рэпліку прылады: «Прабачце, чым я магу вам дапамагчы?»

Джэксан адправіў запіс Amazon, якая правяла расследаванне і прыкладна праз тыдзень вярнула яму доступ да акаўнта.

Інжынер кажа, што цалкам падтрымлівае тое, што кампанія абараняе сваіх працаўнікоў. Але на час расследавання ўся смарт-сістэма ягонага дома зрабілася неюзабельнай. Цяпер ён насур’ёз хоча адмовіцца ад калонак Echo і расказаць пра свой выпадак астатнім карыстальнікам. Гісторыю ён выклаў у сябе ў блогу і на /watch?v=_onpy_gGnyU" target="_blank" rel="noopener">YouTube.

Праблема, лічыць ён, тычыцца не толькі Amazon, а ўсіх тэхналагічных кампаній, якія выпускаюць смарт-прылады. «Калі вы купілі прыладу, то яна належыць вам незалежна ад таго, хто вы. Калі вы купілі тостар, то што б вы ні здзейснілі, якім бы дрэнным чалавекам ні былі або якім бы добрым чалавекам ні былі, тостар усё роўна належыць вам… І калі вы і праўда зрабілі штосьці вельмі жудаснае, то не Amazon, не Google, не Apple вырашаць, што з гэтым рабіць», — адзначыў Джэксан.