Амерыканец 6 гадоў бясплатна лётаў на самалётах, выдаючы сябе за бортправадніка

З 2018 па 2024 год Аляксандр выкарыстоўваў сістэму браніравання для супрацоўнікаў авіякампаній, прызначаную для пілотаў і бортправаднікоў. Пракуроры ўсталявалі, што ён здзейсніў 34 пералёты без аплаты, прадстаўляючы фальшывыя звесткі і сцвярджаючы, што з’яўляецца бортправадніком сямі розных авіякампаній

Усяго Аляксандр выкарыстаў каля 30 падробленых нумароў службовых жэтонаў і дат найму. Расследаванне таксама паказала, што мужчына выдаваў сябе за бортправадніка яшчэ ў трох авіякампаніях, забраніраваўшы больш за 120 бясплатных авіярэйсаў.

Аляксандр працаваў з 2015 года ў неназванай авіякампаніі з Даласа, але не ў якасці пілота ці бортправадніка, а аператара анлайн-сістэмы браніравання квіткоў авіякампаніі, якая прапануе бясплатныя або льготныя пералёты для членаў экіпажа ў залежнасці ад стажу і выслугі. Ён быў арыштаваны ў Каліфорніі ў маі гэтага года.

Зараз амерыканцу пагражае да 20 гадоў турмы па чатырох пунктах абвінавачвання ў махлярстве з выкарыстаннем электронных сродкаў і да 10 гадоў за адзін пункт абвінавачвання ў незаконным пранікненні ў ахоўную зону аэрапорта пад ілжывым прэтэкстам. Вынясенне прысуду прызначана на 25 жніўня.