Apple хоча выпусціць разумны пярсцёнак, разумныя акуляры і прасунутыя AirPods. Усё дзеля падтрымання попыту

Журналіст Bloomberg Марк Гурман распавёў пра ініцыятывы кампаніі, якія знаходзяцца на розных этапах распрацоўкі. Па словах Гурмана, Apple ужо некалькі гадоў будуе планы па пашырэнні асартыменту разумных прылад, якія дазвалялі б карыстальніку сачыць за сваім здароўем.

Самым перспектыўным напрамкам можа стаць стварэнне разумнага пярсцёнка, які дазволіў бы адсочваць частату сардэчных скарачэнняў, насычэнне крыві кіслародам, колькасць пройдзеных крокаў і спаленыя калорыі. Гаджат стаў бы кампактным і больш танным аналагам Apple Watch.

Іншая ініцыятыва — гэта стварэнне разумных акуляраў, якія можна было б камфортна насіць увесь дзень. Акуляры дапоўненай рэальнасці дазволілі б замяніць іншыя прылады, напрыклад, бесправадныя навушнікі. Такая прылада можа быць абсталяваная камерамі, дысплэем, дынамікамі і мікрафонам для ўспрымання галасавых каманд.

«Кампанія ўжо абмяркоўвала магчымасць стварэння акуляраў, якія стануць заменай AirPods, але з больш магутнымі акумулятарамі, вялікай колькасцю датчыкаў і больш шырокімі магчымасцямі АІ. Гэта азначае, што людзям не прыйдзецца насіць AirPods — хоць яны могуць выкарыстоўваць іх для больш якаснага гуку», — паведаміў Гурман.

Падобныя акуляры не сталі б заменай Apple Vision Pro, якія нядаўна выйшлі, паколькі занялі б іншую цэнавую нішу — гарнітура каштуе ад $3499. Акрамя таго, медыцынскія эксперты выказваюць асцярогі, што пастаяннае выкарыстанне прылады можа негатыўна адбіцца на здароўе карыстальнікаў.

Трэці напрамак — гэта абсталяванне бесправадных навушнікаў AirPods камерамі для больш выразнага ўспрымання навакольнага становішча і ўзаемадзеяння з АІ-сістэмамі. Распрацоўшчыкі імкнуцца захаваць габарыты навушнікаў. Журналіст лічыць, што Apple для падтрымання попыту засяродзіцца на выпуску больш танных варыянтаў нашэнных прылад.