Apple хоча аўтаматызаваць зборку айфонаў і замяніць палову рабочых

Як высветліла выданне, Apple даручыла менеджарам «скараціць колькасць рабочых на лініях фінальнай зборкі iPhone на 50% на працягу найбліжэйшых некалькіх гадоў». Загад аддаў старэйшы аперацыйны віцэ-прэзідэнт Apple Сабіх Хан. Рашэнне нібыта было прынятае неўзабаве пасля жорсткіх сутыкненняў рабочых з паліцыяй перад галоўнай зборачнай фабрыкай Foxconn у лістападзе 2022 года. Прычынай бунту сталі нявыплачаныя бонусы, праблемы з харчаваннем і недастатковасць супрацькавідных мер.

Для таго, каб паменшыць патрэбнасць у людзях, Apple прасоўвае розныя праекты, звязаныя з ланцужкамі паставак і аўтаматызацыяй вытворчасці, якія раней кансерваваліся праз высокія пачатковыя выдаткі. Патрэбнае абсталяванне можа каштаваць сотні мільёнаў долараў на год. Часам Apple спрабавала перакласці гэтыя выдаткі на партнёраў-вытворцаў, хоць і не заўсёды паспяхова.

Паводле дакументаў Apple, агульная колькасць людзей, якія працуюць на яе ў партнёраў-вытворцаў, уключаючы Foxconn, Luxshare Precision і Pegatron, знізілася з 1,6 млн у 2022 годзе да 1,4 млн у 2023-м.

Велізарную частку працы па аўтаматызацыі вядзе аперацыйны віцэ-прэзідэнт Apple Пітэр Томпсан. За апошні год яго камандзе ўдалося аўтаматызаваць некалькі этапаў вырабу айфонаў, напрыклад, устаноўку металічных крапежных дэталяў і гнуткіх друкаваных плат на кампаненты. Гэта дазволіла Apple і яе партнёрам скараціць тысячы працоўных месцаў у Кітаі. На некаторых працэсах колькасць занятых рабочых зменшылася на 30%.