Apple кантралюе больш за палову рынку ШІ-камп’ютараў

У 2024 годзе на Apple прыпала больш за палову — 54% — усіх персанальных камп’ютараў, абсталяваных спецыялізаванымі чыпамі для выканання ШІ-задач. Доля яе бліжэйшых канкурэнтаў, Lenovo і HP, склала па 12%. Аднак у 4-м квартале доля Apple была ніжэй — 45%, а Lenovo і HP займалі 15% і 14% адпаведна.

Тым не менш, менавіта гэтыя дзве кампаніі трымаюць лідарства на рынку ПК у цэлым — у іх 25% і 20% адпаведна. Тройку замыкае Dell (15%). Apple ідзе на 4-м месцы (10%), але менавіта яна паказала найбольшы рост па выніках квартала.

Аналітыкі Canalys адзначаюць, што камерцыйныя пастаўкі ПК з падтрымкай штучнага інтэлекту растуць дзякуючы праграмам і прадуктам, арыентаваным на бізнес. Intel умацоўвае пазіцыі ў прэміяльным сегменце з чыпамі Lunar Lake, тады як AMD і Qualcomm актыўна працуюць над больш даступнымі рашэннямі сярэдняга класа. Qualcomm таксама пашырае лінейку, плануючы выпуск X-чыпаў Snapdragon для ноўтбукаў коштам каля $600. У той жа час зніжэнне коштаў на папярэднія пакаленні Mac узмацняе пазіцыі Apple, асабліва на рынках, што развіваюцца. Чакаецца, што спыненне падтрымкі Windows 10 стане магутным драйверам абнаўлення ПК у 2025 годзе.