Apple вызваліла ад выплаты абавязковага збору распрацоўшчыкаў у ЕС, але не ўсіх

Паводле новых правілаў Apple, асноўны тэхналагічны збор (Core Technology Fee — CTF) складае 0,5 еўра за кожную першую ўсталёўку праграмы на працягу года. Гэты збор пачне спаганяцца пасля 1 мільёна ўсталёвак у ЕС. Акрамя таго, Apple паабяцала прымяніць новыя правілы для праграм iPad гэтай восенню.

Кампанія заявіла, што не будзе спаганяць збор са стваральнікаў праграм, якія не ўдзельнічаюць у праграме манетызацыі, а таксама не прапаноўваюць продажу лічбавага кантэнту ўнутры праграмы або фізічных тавараў. Apple лічыць, што гэтае паслабленне дазволіць некамерцыйным распрацоўшчыкам ствараць папулярныя праграмы бясплатна.

Таксама невялікія кампаніі з гадавым прыбыткам меншым за 10 мільёнаў еўра атрымліваюць трохгадовы льготны перыяд і не будуць плаціць CTF. Аднак калі даход кампаніі за гэтыя тры гады вырасце да 10-50 мільёнаў еўра, Apple пачне спаганяць плату пасля першага мільёна штогадовых усталёвак. Сума збору будзе абмежаваная 1 мільёнам еўра на год.

Генеральны дырэктар Epic Games Цім Суіні назваў змены «чарговым нядобрасумленным крокам» Apple. На яго думку, кампанія незаконна патрабуе ад распрацоўшчыкаў аддаваць ёй частку даходаў з праграм, якія будуць распаўсюджвацца праз іншыя крамы.