Аддзел навін 24 снежня 2022, 12:14

Арт-пляцоўка пачала блакаваць выявы з пратэстамі супраць нейрасетак

Мадэратары сайта ArtStation, дзе лічбавыя мастакі публікуюць свае партфоліа, сталі выдаляць з галоўнай старонкі малюнкі, апублікаваныя на знак пратэсту супраць работ нейрасеткі.

1 каментарый

Мадэратары сайта ArtStation, дзе лічбавыя мастакі публікуюць свае партфоліа, сталі выдаляць з галоўнай старонкі малюнкі, апублікаваныя на знак пратэсту супраць работ нейрасеткі.

Прадстаўнікі ArtStation заявілі, што пачалі хаваць такія ілюстрацыі, бо яны парушаюць правілы платформы. Там дадалі, што хочуць, каб карыстальнікам было зручна выкарыстоўваць сайт.

У адказ некаторыя карыстальнікі сталі пакідаць ArtStation і выдаляць свае галерэі. У трэндах платформы пачалі з’яўляцца развітальныя пасты ад мастакоў, у якіх яны пішуць, што сыходзяць праз пазіцыю адміністрацыі. Такіх паведамленняў становіцца ўсё больш, і паступова яны выцясняюць з галоўнай старонкі звычайныя арты.

У развітальных пастах некаторыя мастакі заклікаюць падпісчыкаў пераходзіць на іншыя платформы або падпісвацца на іх у сацсетках.

Карыстальнікі ArtStation пачалі масава пратэставаць супраць публікацыі на сайце артаў, згенераваных нейрасеткамі, на пачатку снежня. Мастакі патрабуюць, каб на платформе цалкам забаранілі падобныя ілюстрацыі, якія часцяком адкрыта капіруюць аўтарскія работы.

У сярэдзіне снежня прадстаўнікі ArtStation паведамілі, што пакуль не будуць гэтага рабіць, бо не хочуць «перашкаджаць даследаванням і камерцыялізацыі АІ».