Аўдыторыя ChatGPT на 85% складаецца з мужчын

Паводле звестак аналітычнай кампаніі Appfigures, агульныя выдаткі карыстальнікаў на праграмы са штучным інтэлектам у 2024 годзе выраслі да $1,42 мільярда, пры гэтым рост у параўнанні з 2023 годам склаў 274%. Праграма ChatGPT ад OpenAI лідзіруе ў гэтым сегменце, апярэджваючы па даходах усе астатнія праграмы-памочнікі на базе АІ разам узятыя.

У 2024 годзе ChatGPT быў спампаваны 353 мільёны разоў. Больш як палова карыстальнікаў мабільнай версіі ChatGPT маладзейшая за 25 гадоў. Другая па велічыні ўзроставая група — гэта карыстальнікі ва ўзросце ад 50 да 64 гадоў, якія складаюць 20,2%.

Паводле ацэнак Appfigures, мужчыны складаюць 84,5% усіх карыстальнікаў праграмы. Нягледзячы на тое, што жанчыны займаюць вядомыя ролі ў індустрыі АІ, апытанне Pew Research Center 2022 года паказвае, што жанчыны, як правіла, скептычней за мужчын ставяцца да АІ.

Апытанне Axios паказала, што 53% апытаных жанчын не дазволілі б сваім дзецям выкарыстоўваць АІ у параўнанні з 26% мужчын. Акрамя таго, паводле ацэнак McKinsey, жанчыны з большай верагоднасцю могуць страціць працу праз аўтаматызацыю, што можа ўзмацніць іх супраціў укараненню АІ.

Поспех такіх праграм, як ChatGPT, таксама выгадны Apple і Google, якія атрымліваюць каля 30% даходаў ад пакупак у праграмах. Паводле даных справаздачы, у цэлым рынак мабільных АІ-праграм складае $2 мільярды.