Некалькі анлайн-платформаў — Reddit, Yahoo, Medium, Quora і People Inc. — абвясцілі аб падтрымцы Really Simple Licensing (RSL), адкрытага стандарту ліцэнзавання, які дазваляе выдаўцам самастойна вызначаць умовы выкарыстання іх кантэнту пры навучанні штучнага інтэлекту.
Некалькі анлайн-платформаў — Reddit, Yahoo, Medium, Quora і People Inc. — абвясцілі аб падтрымцы Really Simple Licensing (RSL), адкрытага стандарту ліцэнзавання, які дазваляе выдаўцам самастойна вызначаць умовы выкарыстання іх кантэнту пры навучанні штучнага інтэлекту.
Стандарт будуецца на базе звыклага пратаколу robots.txt, але пашырае яго: цяпер сайты могуць не толькі забараняць ці дазваляць доступ ботам, але і ўказваць умовы ліцэнзіі і роялці. Гэтыя ўмовы можна ўкараняць не толькі ў сайты, але і ў кнігі, відэа і навучальныя датасэты.
Магчымыя розныя мадэлі аплаты: падпіска для ШІ-кампаній, аплата за кожны абыход сайта, pay-per-inference — плата за выкарыстанне матэрыялу ў адказах ШІ. Пры гэтым звычайныя пошукавыя ці архіўныя боты працягваюць працаваць без абмежаванняў.
Запускам RSL займаецца новая арганізацыя RSL Collective, якую ўзначалілі Экарт Вальтэр (суаўтар RSS) і Даг Лідс (былы гендырэктар Ask.com). Па іх словах, мэта праекта — стварыць «новую маштабаваную бізнес-мадэль для інтэрнэту», якая дазволіць аўтарам і выдаўцам атрымліваць кампенсацыю ад ШІ-распрацоўшчыкаў.
Поспех стандарту залежыць ад таго, ці пагодзяцца буйнейшыя ШІ-кампаніі яго падтрымаць. Раней іх неаднаразова абвінавачвалі ў ігнараванні robots.txt. Акрамя таго, пакуль немагчыма тэхнічна адсачыць «pay-per-inference» без удзелу саміх распрацоўшчыкаў мадэляў.
Для ўзмацнення кантролю RSL Collective супрацоўнічае з воблачнай платформай Fastly: сетка зможа прапускаць на сайт толькі тыя боты, якія пацвердзілі ліцэнзаванне кантэнту. Аналогію арганізатары праводзяць з музычнымі правамі і сістэмамі кшталту ASCAP.
Многія медыя ўжо заключалі асобныя пагадненні з OpenAI, Amazon і іншымі гульцамі, але RSL імкнецца спрасціць працэс і зрабіць яго даступным для любога аўтара. «Мы не вынаходзім кола нанова, — кажа Лідс. — Мы пераносім праверэныя механізмы ліцэнзавання ў сферу, дзе іх раней не існавала».
Рэлацыраваліся? Цяпер вы можаце каментаваць без верыфікацыі акаўнта.