Беларусам забароняць працаваць на аб’ектах крытычнай інфраструктуры ў Латвіі

Крытычная інфраструктура — гэта размешчаныя ў Латвіі аб’екты, сістэмы або іх часткі, што адыгрываюць значную ролю ў забеспячэнні важных грамадскіх функцый, а таксама ў ахове здароўя, бяспекі, эканамічнага або сацыяльнага дабрабыту людзей.

Паводле паправак, грамадзяне Беларусі і Расіі не змогуць працаўладкоўвацца або аказваць паслугі ў крытычнай інфраструктуры ці ў асабліва значнай на еўрапейскім узроўні крытычнай інфраструктуры, калі для гэтага патрабуецца доступ да інфармацыі або тэхналагічнага абсталявання, важных для функцыянавання гэтай інфраструктуры. Працоўная дзейнасць на такіх аб’ектах для грамадзян дзвюх краін будзе магчымай толькі ў выключных выпадках — на падставе асобнага дазволу латвійскага органа дзяржаўнай бяспекі.

Акрамя таго, папраўкі забараняюць фізічным і юрыдычным асобам з Беларусі і Расіі станавіцца ўласнікамі, кіраўнікамі або фактычнымі бенефіцыярамі крытычнай інфраструктуры або інфраструктуры еўрапейскага значэння. Таксама беларусы і расіяне не змогуць займаць пасады ў структурах такой інфраструктуры.