Беларуская калонія пераходзіць на расійскі MAX, сваякоў зняволеных прымушаюць таксама
Паводле паведамлення беларускіх праваабаронцаў, на мінулым тыдні сваякам асуджаных, якія знаходзяцца ў ІК-22 «Воўчыя норы», пачалі рэкамендаваць усталяваць расійскую аплікацыю MAX ад VK для дазволеных галасавых і відэазванкоў. У бліжэйшыя тыдні адміністрацыя калоніі плануе адмовіцца ад Viber, а WhatsApp на камп’ютарах установы ўжо заблакаваны.
Калонія знаходзіцца ў 20 кіламетрах ад Івацэвічаў у лесе, сувязь там стабільна дрэнная. Па логіцы адміністрацыі, расійскі месэнджар будзе працаваць лепш, таму што астатнія могуць адключыць з-за санкцый. Акрамя таго, у Расіі заблакаваны ці абмежаваны многія заходнія і нават кітайскія месэнджары, уключна з WhatsApp, Telegram, Viber, Discord, Microsoft Teams, WeChat, Snapchat, Signal і Messenger. З-за гэтага зняволеныя з расійскім грамадзянствам не могуць датэлефанавацца дадому.
У сеціве водгукі пра MAX розныя — хтосьці хваліць якасць сувязі, хтосьці наадварот кажа, што такой дрэннай не сустракаў больш нідзе. Аплікацыя вызначаецца цікаўнасцю: яна патрабуе доступ да камеры, мікрафона, кантактаў, файлаў і геалакацыі карыстальніка. Усе дадзеныя захоўваюцца на серверах у Расіі. Эксперты па бяспецы лічаць яго інструментам сачэння. У верасні Дзмітрый Пяскоў заявіў, што ўсе дадзеныя, што праходзяць праз яго, «празрыстыя» для спецслужбаў. «Медуза» ў тым жа месяцы пісала, што расіян заганяюць у месэнджар «пагрозамі, угаворамі і рэкламай».
Читать на dev.by