«Купляйце беларускае»: беларускім вытворцам усталююць KPI па продажах на маркетплэйсах

У ведамстве вырашылі дапоўніць пагадненне паміж МАРГ, Мінпрамам, Міністэрствам архітэктуры і будаўніцтва, канцэрнамі «Белдзяржхарчпрам», «Беллёгпрам» і «Беллесбумпрам» аб супрацоўніцтве па павышэнні эфектыўнасці продажаў беларускіх тавараў праз інтэрнэт-пляцоўкі. У ім з’явяцца мерапрыемствы па актывізацыі экспартных продажаў такіх тавараў праз маркетплэйсы з усталяванымі KPI для вытворцаў.

Таксама прадстаўнікі пляцовак пагадзіліся рэалізоўваць праекты дзяржаўна-прыватнага партнёрства і сацыяльныя праекты ў Беларусі на аснове інвестыцыйных дагавораў з мясцовымі органамі ўлады. Гэта датычыцца праектаў па стварэнні працоўных месцаў, падтрымцы малога і сярэдняга бізнесу, развіцці сельскіх паселішчаў.

У сакавіку ведамства заклікала беларускіх вытворцаў павялічыць прысутнасць на маркетплэйсах. На чэрвеньскай сустрэчы ў Мінгарвыканкаме з кіраўнікамі прадпрыемстваў лёгкай прамысловасці гаварылася, што буйныя маркетплэйсы зацікаўлены ў працы з вытворцамі з Беларусі. Частка з іх ужо шчыльна супрацоўнічае з Wildberries, але ёсць праблемы.

У канцы жніўня 2024 года ў МАРГ заяўлялі, што неабходнасці стымуляваць маркетплэйсы прадаваць беларускія тавары няма, бо пляцоўкі самі зацікаўлены ў гэтым, хаця самі беларускія вытворцы да іх ідуць неахвотна.