Беларусы масава скардзяцца на праблемы з PayPal

У банках, куды звярталіся карыстальнікі, ніякіх зваротаў ад PayPal не атрымлівалі.

«Падтрымка „БНБ“ кажа, што з іх боку перашкод няма, і таксама няма ніякіх зваротаў да карткі падчас прывязкі ці праверкі, каб яны маглі зразумець прычыну. Падобна, PayPal не можа дастукацца да гэтых картак, таму што нейкі банк-пасярэднік (рэспандэнт), хутчэй за ўсё, заблакаваў белкарты», — напісаў адзін з іх.

Аналагічная сітуацыя ў кліентаў «Альфа-Банка» — пару дзён таму ўсё плацілася і карткі верыфікаваліся, а цяпер транзакцыі не праходзяць. «У банку сказалі, што запытаў нават не паступала — значыць, блакіроўка на баку PayPal. У падтрымку пісаць бескарысна — спрабаваў», — паскардзіўся адзін з іх. 

У кагосьці атрымліваецца перамагчы PayPal з пераменным поспехам: «У мяне такая ж карцінка. Спрабаваў Visa ад „Прыёрбанка“ і „Беларусбанка“. Што цікава — у іншай краме аплата праз PayPal прайшла».

У некаторых пры разліку раптам усплываюць паведамленні, што картка скончылася, хоць на самай справе актыўная. Такая сітуацыя была, напрыклад, у кліента «Парытэтбанка».

Ніякіх афіцыйных каментарыяў па сітуацыі ні ад PayPal, ні ад беларускіх банкаў пакуль не паступала. У чым прычына збояў, незразумела. Сярод краін, з якімі PayPal не сябруе, Беларусі няма — дакладней, яна ёсць у спісе тых, дзе сэрвіс аказвае паслугі.