Беларусы выпусцілі атмасферны трэйлер да гульні пра старажытны Тураў. Ён на мове

Першы варыянт трэйлера выйшаў на два тыдні раней на рускай, але многія гледачы папрасілі агучыць відэа і па-беларуску. У гэтым распрацоўшчыкам дапамагла каманда «Мой родны кут».

Сюжэт заснаваны на гісторыі Беларусі, дзеянне разгортваецца ў XI–XIII стагоддзях на тэрыторыі некалі ўплывовага Тураўскага княства. Галоўны герой, за якога давядзецца гуляць, — рыцар Філіп, сын пасадніка, якому трэба разгадаць таямніцу старажытнага ордэна, выратаваць бацьку і перамагчы ворагаў.

Студыю заснавалі чацвёра беларускіх студэнтаў, цяпер у камандзе праекта 11 чалавек. Рэліз гульні чакаецца ў другой палове гэтага года. Яе ўжо можна дадаць у спіс жаданых у краме Steam.

Сюжэтная лінія Tales of Meadows будзе даволі кароткай — усяго 4–5 гадзін, але гэта кампенсуецца адкрытым светам беларускага мінулага. Натхненне распрацоўшчыкі чэрпалі з такіх папулярных AAA-праектаў, як Assassin’s Creed і Вядзьмар.