Белавія трапіла пад санкцыі ЗША

У санкцыйным спісе апынулася нацыянальная авіякампанія «Белавія». Таксама пад санкцыі трапілі Мінскі завод грамадзянскай авіяцыі, Беларускі металургічны завод, ТАА «БелКапСціл» і дэпартамент фінансавых расследаванняў Камітэта дзяржаўнага кантролю.

Акрамя таго, санкцыі закранулі некалькі фізічных асоб. Сярод іх апынуліся, у прыватнасці, дырэктар дэпартамента фінансавых расследаванняў КДК Ігар Маршалаў, яго намеснікі, гендырэктар ААТ «БМЗ — кіруючая кампанія холдынгу «БМК» Зміцер Корчык.

Варта дадаць, што раней ЗША ўжо абмяжоўвалі дзейнасць «Белавія». У чэрвені гэтага года Міністэрства гандлю ЗША падоўжыла на 180 дзён экспартныя абмежаванні ў дачыненні да авіякампаніі — да 13 снежня 2023 года. 

Такія санкцыі былі ўведзеныя яшчэ ў чэрвені 2022 года, бо кампанія выкарыстоўвала вырабленыя ў ЗША самалёты Boeing, нягледзячы на абмежаванні, уведзеныя пасля ўварвання Расіі ва Украіну. У снежні 2022 года экспартныя абмежаванні працягнулі на паўгода. Кампаніям ва ўсім свеце забаронена абслугоўваць, рамантаваць або іншым чынам выкарыстоўваць амерыканскія запчасткі для флоту «Белавія».