Belka Games звольніла мінімум 30 чалавек

Сярод звольненых ёсць спецыялісты па наратыўным дызайне, рэкрутынгу, тэхнічным і 2D-арце, гейм-дызайнеры, кам’юніці-менеджары, а таксама некалькі цімлідаў.

Усяго выданне налічыла каля 30 профіляў з пазнакай Open to work. На афіцыйным сайце кампаніі цяпер размешчаныя 3 вакансіі.

Паводле даных AppMagic, 2023 год быў складаным для Belka Games. Яе мабільная выручка ўпала да $5-6 млн на месяц — у пікавы для студыі 2021 год яна была $10-11 млн.

Мяркуючы з аналітыкі, у другую палову 2023 года кампанія пачала нарошчваць закупкі трафіку. У снежні месячныя аб’ёмы дасягнулі ўзроўню 2021 года, але гэта не прывяло да супастаўнага росту заробку.

У лютым мабільная выручка студыі ўпала да $ 4,6 млн. Апошні раз яна зарабляла столькі ў сярэдзіне 2019 года. З улікам таго, што цяпер дзённая выручка Belka Games складае прыкладна $120-150 тысяч, яе выручка за красавік можа скласці прыкладна 4 млн.

«Кампанія скарэктавала стратэгію, у выніку чаго мы сталі крытычней глядзець на прадукты. Было прынятае складанае рашэнне аб скарачэнні 20% каманды. Мы ўдзячныя кожнаму за неацэнны ўнёсак у развіццё Belka Games і выкарыстоўваем усе нашыя рэсурсы для таго, каб людзі змаглі знайсці новыя кар’ерныя магчымасці», — адзначыў CEO Belka Games Аляксандр Багданаў у каментары app2top. Ён дадаў, што кампанія плануе засяродзіцца на распрацоўцы новых хітоў і падрыхтавацца да наступнага этапу росту.

Belka Games — адзін з найбуйнейшых мабільных распрацоўшчыкаў з беларускімі каранямі. Студыя з’яўляецца стратэгічным партнёрам AppLovin — сусветнай мабільнай рэкламнай платформы.

На пачатку лютага стала вядома, што Belka Games ліквідуе юрыдычную асобу ў Мінску. Афіцыйна працэдура была запушчаная пры канцы мінулага снежня.

У сакавіку 2022 года кампанія стала паступова сыходзіць з Расіі. Офіс у Беларусі на той момант працягваў працаваць, але яшчэ ў 2021 годзе кампанія ўвяла мараторый на найманне ў краіне. Ахвотным пераехаць давалі магчымасць уладкавацца ў Польшчы, Літве і Чарнагорыі. Шмат супрацоўнікаў з Беларусі сыходзіла самастойна, хтосьці згаджаўся на рэлакейт і пераязджаў, кагосьці скарачалі.

У лютым 2024 года ў кампаніі працавала больш за 300 чалавек. У яе адкрытыя падраздзяленні ў шасці краінах: у Літве, Польшчы, Украіне, Грузіі, Чарнагорыі і на Кіпры.