Гейтс паабяцаў раздаць усё сваё багацце за 20 гадоў

«На працягу наступных 20 гадоў я перадам практычна ўсё сваё багацце праз Фонд Гейтса на мэты выратавання і паляпшэння жыцця людзей па ўсім свеце. А 31 снежня 2045 года фонд зачыніць свае дзверы назаўсёды», — напісаў Гейтс на сваім сайце.

Паводле дадзеных Reuters, Гейтс ускосна раскрытыкаваў прэзідэнта ЗША Дональда Трампа за скарачэнне амерыканскіх праграм дапамогі, падкрэсліўшы неабходнасць выратавання нованароджаных, дзяцей і маці ад прычын смерці, якія можна прадухіліць, выкаранення поліяміеліту, малярыі і коры, а таксама зніжэння ўзроўню беднасці.

«Людзі будуць шмат што гаварыць пра мяне пасля маёй смерці, але я хачу зрабіць так, каб сярод гэтага не было фразы: „Ён памёр багатым“», — заявіў Гейтс.

Першапачаткова Біл і Мелінда Гейтс, якія заснавалі фонд у 2000 годзе, планавалі, што арганізацыя будзе працягваць працу і пасля іх смерці. Аднак цяпер Гейтс вырашыў паскорыць працэс перадачы сродкаў. З моманту заснавання фонд вылучыў $100 мільярдаў на барацьбу са СНІДам, туберкулёзам, малярыяй і іншымі глабальнымі праблемамі.

The New York Times адзначае, што гэтая заява супала з 25-годдзем Фонду Гейтса. Фонд працягне засяроджвацца на трох ключавых мэтах: прадухіленне смерцяў маці, дзяцей і немаўлят ад прычын, якія можна прадухіліць,  ліквідацыя інфекцыйных захворванняў і зніжэнне беднасці.