Николай Чикишев 9 лістапада 2022, 12:07

Крыптавалютная біржа Binance вырашыла купіць канкурэнта FTX

Мільярдэр Сэм Банкман-Фрыд прадае трэцюю паводле велічыні крыптабіржу ў свеце FTX найбуйнейшаму гульцу на рынку — Binance.

Пакінуць каментарый

Крыптавалютная біржа Binance вырашыла купіць канкурэнта FTX

Мільярдэр Сэм Банкман-Фрыд прадае трэцюю паводле велічыні крыптабіржу ў свеце FTX найбуйнейшаму гульцу на рынку — Binance.

Пра будучую ўгоду паведамілі адначасова Банкман і кіраўнік Binance Чанпэн Чжао. «Сёння днём FTX папрасіла нас дапамагчы. У іх сур’ёзны крызіс ліквіднасці», — напісаў Чанпэн. Фрыд паведаміў, што ў выніку ўгоды ўсе актывы кліентаў FTX будуць цалкам забяспечаныя. Таксама бізнэсовец абверг паведамленні пра канфлікт паміж Binance і FTX.

Раней 2 лістапада ў выданні Coindesk быў апублікаваны артыкул, у якім расказвалася, што мінімум 40% актываў трэйдынгавай кампаніі Банкмана-Фрыда Alameda Research прыпадае на нізкаліквідную крыптавалюту FTT, выпушчаную яго ж біржай FTX. Публікацыя адбілася на паводзінах інвестараў — пачаўся абвал каціровак.

Пасля гэтага Чанпэн Чжао абвясціў, што ліквідуе ўсе свае пазіцыі ў FTT на $580 мільёнаў, якія ўзніклі пасля таго, як кампанія Чанпэна прадала сваю долю FTX за $2,1 мільярда ў 2021 годзе. «Гэта проста кіраванне рызыкамі, здабыванне навукі з кейсу LUNA. Мы падтрымлівалі [FTX] раней, але не будзем гуляцца ў каханне пасля разводу. Мы не выступаем супраць нікога. Але мы не падтрымаем людзей, якія лабіруюць супраць іншых гульцоў за іх спінамі», — растлумачыў ён сваё рашэнне.

Нягледзячы на запэўненні Фрыда ў адсутнасці канфлікту, шматлікія публікацыі кажуць пра адваротнае. Адна з тэм, якая выклікае рознагалоссі паміж бізнэсоўцамі — гэта законапраект DCCPA, які называюць «забойцам дэцэнтралізаваных фінансаў» — ён прапануе жорстка зарэгуляваць крыптавалютны рынак, дэ-факта пазбавіўшы яго ўдзельнікаў ананімнасці. Фрыд актыўна лабіраваў прыняцце закона, Чанпэн заўжды выступаў заўзятым праціўнікам абмежаванняў.

У выніку каціроўкі FTT абваліліся на 30%, за мінулыя трое сутак інвестары вывелі з FTX $6 мільярдаў, праз некалькі гадзін пасля гэтага біржы абвясцілі пра ўгоду. Эксперты адзначаюць, што крызіс FTX — чацвёрты крыптавалютны крах сёлета: да гэтага былі кейсы Luna/UST, Celsius, Three Arrows Capital.

Усе яны адбываліся паводле падобнага сцэнара: інвестары даведваліся пра праблемы з ліквіднасцю крыптапраектаў і забіралі грошы. У выпадку FTX у «крызісе даверу» браў удзел яго прамы канкурэнт. Услед за FTT біткойн патаннеў на 17% разам з усімі асноўнымі крыптавалютамі. Угода між двума буйнымі гульцамі галіны можа непрадказальным чынам змяніць архітэктуру крыптарынку, адзначаюць аналітыкі.