Bloomberg: Apple хоча дадаць AI-мадэль Gemini у iPhone

Журналіст Bloomberg Марк Гурман са спасылкай на крыніцы сцвярджае, што Apple вядзе перамовы з Google пра Gemini. Кампанія плануе атрымаць ліцэнзію на выкарыстанне мадэлі для дадання АІ-функцый у iOS у 2024 годзе. Гаворка ідзе пра інструменты генерацыі тэксту і выяў. Умовы партнёрства яшчэ не вызначаныя. Акрамя Google разглядаўся варыянт партнёрства з OpenAI.

Apple мае шматгадовае пагадненне з Google у сферы пошуку: штогод тая плаціць мільярды долараў за тое, каб яе пошукавая сістэма была ўсталяваная ў Safari па змаўчанні. У сувязі з гэтым Мінюст падаў у суд на кампанію за манапалізацыю рынку браўзераў. Цяпер новае партнёрства ў сферы АІ таксама можа прыцягнуць увагу рэгулятара.

Раней з’явілася інфармацыя, што Apple распрацоўвае ўласную генератыўную мадэль пад кодавай назвай Ajax. У лютым кіраўнік кампаніі Цім Кук заявіў, што неўзабаве Apple пакажа свае распрацоўкі ў сферы генератыўнага АІ. Гурман мяркуе, што кампанія не змагла дамагчыся ўражальных вынікаў і таму звярнулася да Google.