Bloomberg: Microsoft плануе ўкласці да $10 млрд у распрацоўшчыка ChatGPT

Паводле даных крыніц Bloomberg, Microsoft плануе інвеставаць у кампанію на працягу некалькіх гадоў, аднак выніковыя ўмовы ўгоды могуць змяніцца. Сцвярджаецца, што кампаніі вядуць перамовы на працягу некалькіх месяцаў. Патэнцыяльнымі інвестарамі OpenAI могуць выступіць венчурныя кампаніі. Партал Semafor паведамляе, што распрацоўшчык можа быць ацэнены прыкладна ў $29 мільярдаў.

Пры канцы лістапада ChatGPT імкліва набраў папулярнасць пасля запуску: колькасць карыстальнікаў чат-бота дасягнула 1 мільёна чалавек менш як за тыдзень. Раней Microsoft ужо інвеставала ў Openal каля $1 мільярда. Цяпер кампанія працуе над уключэннем чат-бота ў свой пашукавік Bing і сэрвісы Office.