Blue Origin адновіць субарбітальныя палёты пасля доўгай паўзы

«Мы нацэленыя на акно запуску, якое адкрыецца 18 снежня, для нашай наступнай місіі з карыснай нагрузкай New Shepard. NS24 даставіць у космас 33 навукова-даследчыя грузы, а таксама 38 000 паштовак @clubforfuture», — напісала Blue Origin у X. Паўза ў палётах была звязаная з правядзеннем органамі-рэгулятарамі ЗША расследавання няўдалага запуску карабля ў верасні мінулага года. Федэральнае ўпраўленне грамадзянскай авіяцыі ЗША (FAA) запатрабавала ўнесці 21 дапрацоўку ў праект.

«Blue Origin мусіць ажыццявіць усе карэктуючыя дзеянні, якія ўплываюць на грамадскую бяспеку, і атрымаць мадыфікацыю ліцэнзіі ад FAA, якая ўлічвае ўсе патрабаванні бяспекі і іншыя прыдатныя нарматыўныя патрабаванні да наступнага запуску New Shepard», — заявіў рэгулятар. Дапрацоўкі былі ўмовай для атрымання дазволу на аднаўленне палётаў. Відаць, Blue Origin завяршыла працу па выпраўленні недахопаў. Цяпер New Shepard адпраўляецца на стартавую пляцоўку ў Заходнім Тэхасе.