Больш за палову расійскіх працэсараў Baikal бракаваныя

Паводле крыніц выдання, больш за 50% працэсараў выявіліся бракаванымі. Раней вытворчасць і карпусаванне чыпаў праходзіла на тайваньскай фабрыцы TSMC, але пасля ўварвання Расіі ва Украіну і ўвядзення санкцый супрацоўніцтва было спыненае.

Яшчэ ў лістападзе 2021 года «Байкал Электронікс» пачаў тэсціраваць працэс карпусавання — гэта ўстаноўка паўправадніковых крышталяў у корпус, завяршальная стадыя вытворчасці працэсараў — на магутнасцях холдынгу GS Group ў Калінінградскай вобласці. Цяпер плануецца пашырыць вытворчасць, задзейнічаўшы фабрыкі «Міландра» і «Мікрона» пад Масквой. Высокі ўзровень браку звязваюць з састарэлым абсталяваннем і недахопам вопыту ў супрацоўнікаў.

Нягледзячы на гэта, кампанія мае намер працягнуць эксперыменты па пераносе зборкі працэсараў на расійскія магутнасці, палепшыць іх якасць і павялічыць долю на рынку.