Былога юрыста Apple аштрафавалі на $1,15 млн за інсайдарскі гандаль

«48-гадовы Джын Левоф з Сан-Карласа, штат Каліфорнія, у часе відэаканферэнцыі з акруговым суддзёй ЗША Уільямам Дж. Марціні прызнаў сябе вінаватым у шасці пунктах абвінавачвання ў махлярстве з каштоўнымі паперамі», — паведамляецца на сайце Мінюста ЗША. Падсуднага прысудзілі да штрафу ў памеры $1,15 мільёна.

Левоф адказваў у кампаніі за прадухіленне інсайдарскага гандлю. У яго абавязкі ўваходзіў кантроль за выкананнем супрацоўнікамі Apple палітыкі кампаніі. Дзякуючы свайму становішчу ён атрымліваў фінансавыя вынікі Apple, перш чым яны былі апублікаваныя.

Адвакаты падсуднага назвалі штраф празмерным, улічваючы супрацоўніцтва іх кліента са следствам, чатырохгадовы выпрабавальны тэрмін і 2 тысячы гадзін грамадскіх работ, якія ён ужо адбыў, а таксама канфіскацыю $604 тысяч. Суддзя Уільям Марціні палічыў, што штраф дарэчны, паколькі Левоф здзейсніў «асабліва абуральныя» дзеянні ў якасці галоўнага юрыста Apple, які кантралюе праграму па інсайдарскай інфармацыі.

У 2019 годзе юрыста абвінавацілі ў арганізацыі і рэалізацыі на працягу пяці гадоў схемы інсайдарскага гандлю, для якога ён выкарыстоўваў унутраную фінансавую інфармацыю. Паводле версіі следства, Левоф скупляў акцыі перад публікацыяй добрых вынікаў і прадаваў іх, калі выручка была ніжэйшай за чаканую. Гэтыя звесткі дазволілі яму зарабіць $277 тысяч і пазбегнуць страт на $377 тысяч. Усяго юрыст валодае багаццем у памеры $13 мільёнаў.