CEO Airbnb растлумачыў, чаму добра пачынаць бізнес, калі ў эканоміцы ўсё дрэнна
Браян Чэскі запусціў Airbnb у 2007 годзе. У нядаўнім выпуску падкаста Мішэль Абамы ён распавёў, што развіваць кампанію падчас фінансавага крызісу 2008 года яму і кофаўндарам было складана, нават нягледзячы на пэўныя перавагі і сувязі, якіх не мелі іншыя прадпрымальнікі. Але нават у цяжкія часы ёсць свае плюсы — пра гэта Чэскі раіць памятаць тым, хто запускае сваю справу цяпер, на фоне чарговай эканамічнай турбулентнасці.
Паводле яго слоў, многія вялікія кампаніі пачыналіся падчас рэцэсіі, і гэта навучае фаўндараў адной важнай якасці. «Складаная эканамічная сітуацыя вучыць вас дысцыпліне, якая становіцца часткай вашай культуры», — адзначыў Чэскі. І наадварот, ва ўмовах спрыяльнай эканомікі фаўндары часам схільныя замацоўваць няўдалыя стратэгіі і дзейнічаць з меншай дысцыплінай.
«Добрая навіна ў тым, што многія здольныя прадпрымальнікі неверагодна вынаходлівыя, і яны знойдуць спосаб працаваць», — працягнуў кіраўнік Airbnb, дадаўшы, што, вядома ж, лепш было б, каб эканоміка стабілізавалася.
Прадпрымальнікі, з якімі ён размаўляе, адзначаюць, што фінансаванне ўсіх мэтаў цяпер на паўзе: «Шматлікія абмежаваныя партнёры і інвестары чакаюць. А, як вядома, інвестары не любяць няпэўнасці». Чэскі мяркуе, што інвестары будуць чакаць стабілізацыі эканомікі.
«А калі стабілізацыі не будзе, нас чакае вельмі доўгі перыяд без фінансавання. Калі вы не вучыліся ў прэстыжнай навучальнай установе, калі вы не каманда чыстых тэхнароў, калі вы ствараеце не ШІ-кампанію, а проста кампанію — вам будзе складаней», — лічыць Чэскі.
Airbnb не адзіны паспяховы бізнес, які пачаўся падчас крызісу 2008 года. З тых жа часоў паходзяць, напрыклад, Uber, WhatsApp, Venmo і Square.
З Чэскі згодны і іншыя эксперты: самы слушны час пачынаць справу — гэта заўсёды «цяпер». І часта бізнес, распачаты ва ўмовах складанасці, узлятае менавіта таму, што гэтыя ўмовы прымушаюць фаўндараў дзейнічаць насуперак ім і шукаць вынаходлівыя рашэнні.
Читать на dev.by