CEO Anthropic: ШІ можа знішчыць да 50% пазіцый джуноў

Амадэй прадказаў, што ўзровень беспрацоўя ў ЗША можа ўзрасці да 10–20% у найбліжэйшыя гады. Ён заклікаў урад і ШІ-кампаніі падрыхтаваць краіну да гэтых зменаў, адзначыўшы, што большасць людзей нават не здагадваецца пра пагрозу, якая насоўваецца. «Гэта гучыць вар’яцка, і людзі проста не вераць, — дадаў ён. — Мы, як стваральнікі гэтай тэхналогіі, абавязаныя шчыра казаць пра тое, што нас чакае. Я не думаю, што людзі ўсведамляюць маштаб будучых зменаў».

Эксперт падкрэсліў, што ШІ-кампаніі і ўрад павінны перастаць «прыхарошваць» рызыкі масавых скарачэнняў працоўных месцаў у такіх галінах, як тэхналогіі, фінансы, юрыспрудэнцыя і кансалтынг, асабліва на пачатковых пазіцыях. Паводле новага дакладу венчурнай кампаніі SignalFire, найм новых выпускнікоў у буйныя тэхналагічныя кампаніі скараціўся прыкладна на 50% у параўнанні з дапандэмійным узроўнем, часткова з-за ўкаранення ШІ.

У 2023 годзе тэхналагічная галіна перажыла хвалю масавых звальненняў: кампаніі скарацілі сотні тысяч працоўных месцаў дзеля скарачэння выдаткаў. Хаця, згодна з дадзенымі SignalFire, у 2024 годзе найм на сярэднія і старэйшыя пазіцыі павялічыўся, пачатковыя пазіцыі так і не аднавіліся. У 2024 годзе маладыя спецыялісты склалі ўсяго 7% ад агульнай колькасці наёмных работнікаў у буйных тэхналагічных кампаніях,што на 25% менш, чым у 2023 годзе. У стартапах гэты паказчык знізіўся на 11% у параўнанні з папярэднім годам.

Хізэр Дошэй, партнёр SignalFire, якая курыруе праграмы па найме, распавяла Business Insider: «ШІ выконвае задачы, якія раней даручаліся стажорам і маладым спецыялістам. Цяпер можна наймаць аднаго вопытнага супрацоўніка, забяспечыць яго інструментамі ШІ — і ён здолее выконваць працу малодшага спецыяліста ў дадатак да сваёй, без лішніх выдаткаў».

Яна дадала, што ШІ не цалкам выцясняе катэгорыі працоўных месцаў, а паглынае задачы з нізкім узроўнем кваліфікацыі, што ўскладае на ўніверсітэты, курсы і саміх кандыдатаў задачу хутчэй павышаць свае навыкі. Дошэй раіць маладым спецыялістам успрымаць ШІ як партнёра, а не канкурэнта. «Развівайце здольнасці працаваць як больш дасведчаны спецыяліст, павышайце самастойнасць і дэлегуйце задачы ШІ», — сказала яна.