CEO Microsoft: да 30% кода кампаніі піша ШІ

Выступаючы на Meta LlamaCon, Надэла ўдакладніў, што «магчыма, 20–30% кода, які сёння знаходзіцца ў нашых рэпазіторыях і ў некаторых нашых праектах, верагодна, цалкам напісаны праграмным забеспячэннем». Ён дадаў, што аб’ём кода, які ствараецца ШІ ў Microsoft, «няўхільна расце». Надэла таксама адзначыў, што вынікі выкарыстання ШІ для напісання кода адрозніваюцца ў залежнасці ад мовы праграмавання: большы прагрэс відаць у Python, а меншы — у C++.

У адказ на пытанне Надэлы пра паказчыкі Meta Цукерберг прызнаўся, што дакладную лічбу «адразу» не ведае, але расказаў пра планы Meta па распрацоўцы мадэлі ШІ, якая, у сваю чаргу, зможа ствараць будучыя версіі сямейства мадэляў Meta Llama. Цукерберг выказаў упэўненасць, што «верагодна, на працягу наступнага года палова распрацовак будзе выконвацца ШІ, а не людзьмі, а затым гэтая доля проста будзе расці».

Іншыя буйныя гульцы таксама дзеляцца сваімі дадзенымі. Кіраўнік Google Сундар Пічаі яшчэ ў кастрычніку заяўляў, што больш за 25% новага кода ствараецца ШІ, а ў красавіку гэтага года назваў лічбу «больш за 30%». Дакладныя метады вымярэння долі «сгенераванага ШІ» кода ў Microsoft і Google незразумелыя, таму гэтыя паказчыкі могуць адрознівацца ў залежнасці ад метадалогіі падліку.

Таксама кіраўнік Shopify Тобі Лютке нядаўна паведаміў супрацоўнікам, што ім давядзецца даказаць, што ШІ не можа выканаць іх працу, перш чым прасіць павышэння, а кіраўнік Duolingo Луіс фон Ан абвясціў пра паступовы пераход на выкарыстанне ШІ замест знешніх падрадчыкаў. Доўгатэрміновыя прагнозы амбіцыйныя: тэхнічны дырэктар Microsoft Кевін Скот раней заяўляў, што да 2030 года чакае, што 95% усяго кода будзе генеравацца ШІ.