Генеральны дырэктар OpenAI Сэм Альтман заявіў, што GPT-5 «у многім разумнейшы за яго». І калі з'явіцца звышрозум

Альтмана спыталі, калі, на яго думку, з’явіцца звышінтэлект, які ва ўсім лепшы за чалавека.

«У многіх аспектах GPT-5 ужо разумнейшая за мяне і, як мне здаецца, многіх іншых людзей. GPT-5 здольная рабіць неверагодныя рэчы, якія вельмі ўражваюць многіх людзей. Аднак многія рэчы, якія запроста робіць чалавек, ёй не пад сілу», — сказаў прадпрымальнік.

Ён дадаў, што за тры гады, якія прайшлі пасля рэлізу ChatGPT, мадэлі прасунуліся далёка наперад. Цалкам магчыма, што яшчэ праз пару гадоў ШІ будзе здзяйсняць навуковыя адкрыцці, якія людзі здзейсніць не змаглі б. ШІ з такімі здольнасцямі можна было б назваць «звышінтэлектам», адзначыў Альтман.

«Буду вельмі здзіўлены, калі да канца бягучага дзесяцігоддзя, да 2030 года, у нас не будзе мадэляў з экстраардынарнымі здольнасцямі, якія змогуць рабіць рэчы, якія мы самі рабіць не можам», — адказаў ён на просьбу ўдакладніць даты. Генеральны дырэктар таксама разлічвае, што ў 2026 годзе тэмпы развіцця мадэляў будуць не ніжэй, чым у гэтым і мінулым.

Таксама яго папрасілі спрагназаваць, які працэнт існуючых сёння працоўных месцаў можа знікнуць у найбліжэйшай будучыні. Па словах Альтмана, ужо ў бліжэйшы час 30-40% задач у эканоміцы будзе выконваць ШІ.

Эксперты галіны разыходзяцца ў меркаванні аб перспектывах з’яўлення звышінтэлекту — ацэнкі вар'іруюцца ад некалькіх гадоў да дзесяцігоддзяў. Будзе цікава паглядзець, ці спраўдзяцца прагнозы Альтмана. Генеральны дырэктар Tesla Ілан Маск, які стаяў ля вытокаў OpenAI, а цяпер закідвае яе судовымі пазовамі, ужо больш за дзесяць гадоў абяцае сапраўдны аўтапілот прыкладна «ў наступным годзе», але пакуль так яго і не выпусціў.