CEO Perplexity: ШІ-прадукты Google жахлівыя, мы стварылі канкурэнта Chrome

На саміце Bloomberg Tech у Сан-Францыска генеральны дырэктар Perplexity Аравінд Шрынівас рэзка раскрытыкаваў ШІ-прадукты Google, назваўшы іх асістэнта «жахлівым прадуктам» і абвінаваціўшы кампанію ў штогадовым анансаванні тых самых функцый без іх укаранення.

Perplexity пашырае сваю прысутнасць на рынку пошуку, інтэгруючы ШІ-асістэнтаў у мабільныя прылады і распрацоўваючы ўласны вэб-браўзер Comet. У красавіку Motorola абвясціла, што Perplexity будзе перадўсталявана на новых тэлефонах Razr Ultra. У мінулым месяцы быў падпісаны партнёрскі кантракт з PayPal для спрашчэння пакупак праз асістэнта Perplexity. Таксама, паводле звестак Bloomberg, вядуцца перамовы з Samsung аб магчымай інтэграцыі Perplexity у іх прылады.

Perplexity таксама развівае манетызацыю праз рэкламу, супрацоўнічаючы з брэндамі, такімі як Whole Foods і TurboTax. Уласны браўзер Comet, заснаваны на адкрытым кодзе Chromium ад Google, будзе падтрымліваць кросплатформавыя функцыі, з адкрытымі бэта-версіямі для Windows і macOS у найбліжэйшы час.

Аднак планы Perplexity выклікалі заклапочанасць адносна прыватнасці. Шрынівас дапусціў, што Comet можа сачыць за паводзінамі карыстальнікаў па-за межамі аплікацый Perplexity для стварэння профіляў пад таргетаваную рэкламу. Пазней ён удакладніў, што гэта гіпатэтычны сцэнар, і карыстальнікі змогуць выбіраць паміж адсутнасцю рэкламы або персаналізаванай рэкламай.

Гендырэктар Perplexity абвясціў, што ў маі сэрвіс апрацаваў 780 мільёнаў пошукавых запытаў, што паказала рост на 20% у месяц. Зараз стартап імкнецца дасягнуць 1 мільярда запытаў на тыдзень да канца года. Таксама кампанія актыўна прыцягвае інвестыцыі для развіцця пошукавага напрамку. Цяпер рынкавую вартасць стартапа ацэньваюць у $18 мільярдаў.