Заснавальнік і кіраўнік маркетынгавага агенцтва Brick Media з Тампы Джэйк Курц аднойчы загарэўся ідэяй ідэальнага балансу паміж працай і асабістым жыццём. Натхніўшыся еўрапейскімі прыкладамі, са студзеня 2023-га ён дзеля эксперыменту на 90 дзён дазволіў камандзе адпачываць у пятніцы без скарачэння заробку. Ужо да красавіка новы графік зацвердзілі на пастаяннай аснове, піша Fortune.
Заснавальнік і кіраўнік маркетынгавага агенцтва Brick Media з Тампы Джэйк Курц аднойчы загарэўся ідэяй ідэальнага балансу паміж працай і асабістым жыццём. Натхніўшыся еўрапейскімі прыкладамі, са студзеня 2023-га ён дзеля эксперыменту на 90 дзён дазволіў камандзе адпачываць у пятніцы без скарачэння заробку. Ужо да красавіка новы графік зацвердзілі на пастаяннай аснове, піша Fortune.
Вынікі не прымусілі сябе чакаць. Паводле дадзеных кампаніі, выручка вырасла на 73% у 2023 годзе, яшчэ на 39% у 2024-м і на 8% у 2025-м. У суме за тры гады прырост склаў 160%.
Сам Курц не сцвярджае, што справа толькі ў чатырохдзённым тыдні. Але перакананы: калі даваць людзям важкую прычыну трымацца за сваё месца, кампанія становіцца значна больш эфектыўнай і канкурэнтаздольнай. Многія сусветныя гіганты тым часам адварочваюцца ад гібкіх графікаў і фарсуюць вяртанне ў офісы.
У Brick Media працоўны тыдзень будуецца па схеме «чатыры дні па дзевяць гадзінаў» з панядзелка па чацвер. Усяго — 36 гадзін на тыдзень замест класічных 40, у тым аплочаны абед. Пры гэтым супрацоўнікам захоўваюць статус поўнай занятасці і ўсе бонусы. Такі падыход адрозніваецца як ад практыкі «ўтрамбаваць 40 гадзін у 4 дні», так і ад класічнай 32-гадзіннай мадэлі, за якую агітуюць даследчыкі. Гэта кантрастуе і з агульнай карцінай у сферы медыя і PR, дзе паводле некаторых дадзеных рэгулярна перапрацоўваюць 55% спецыялістаў.
Кліенты агенцтва паставіліся да новага графіка са здзіўленнем і разуменнем: сустрэчы і здымкі лёгка плануюцца загадзя. Зрэдку супрацоўнікам даводзіцца траціць пару хвілін у пятніцы або на выходных на тэрміновыя дробязі, а сур’ёзныя авралы здараюцца не часцей аднаго-двух разоў у квартал. Але галоўнае правіла Курца — не завальваць людзей працай. Калі нагрузка на супрацоўнікаў набліжаецца да мяжы, кампанія папросту наймае новых, а не размазвае задачы па старых. За кошт гэтага штат вырас з 15 чалавек у 2022 годзе да 25 да 2026-га, а колькасць кліентаў павялічылася з 56 да 85 толькі за першую палову бягучага года. Пры гэтым 3 дні на тыдзень супрацоўнікі працуюць з дому.
Курц разглядае ўтрыманне кадраў не як элемент карпаратыўнай культуры, а як паўнавартасную стратэгію росту. «Калі людзі працуюць у нас даўжэй, ім падабаецца тое, што яны робяць, і яны пастаянна ўзаемадзейнічаюць са зьлітой камандай, бізнес становіцца шматкроць эфектыўнейшым», — кажа кіраўнік Brick Media. Вопытным калегам не трэба тлумачыць кожную задачу: пытанні, якія патрабавалі паўгадзінных відэазваротаў, вырашаюцца за пару хвілінаў у калідоры. Такая згуртаванасць непасрэдна ўплывае на кліенцкі сервіс — напрыклад, з 20 новых лідаў у кастрычніку 16 прыйшлі з рэкамендацый.
Цякучасць кадраў у кампаніі ўпала практычна да нуля: калі ў 2022 годзе добраахвотна звольніліся шасцёра, то ў 2023 і 2024-м — па двое, у 2025-м — трое, а за гэты год — ніводнага. На пытанне пра тое, ці змагла б кампанія дасягнуць такіх жа вынікаў пры пяцідзённым тыдні і звышурочных, Курц адказвае адмоўна: «Не. Думаю, людзі б лёгка сыходзілі ад нас за ўмоўную прыбаўку ў $5 тысяч да заробку. Але паспрабаваўшы чатырохдзённы тыдзень, сысці вельмі цяжка — пачынаеш разумець, што жыццё складаецца не толькі з лічбаў у разліковым лісце».
Гэта пацвярджаюць і глабальныя апытанні: у даследаванні Randstad Workmonitor 2026 46% работнікаў назвалі баланс паміж працай і асабістым жыццём галоўнай прычынай заставацца ў кампаніі, тады як узровень заробку паставілі на першае месца толькі 23%.
Самі супрацоўнікі прызнаюцца, што чатырохдзённы тыдзень не паменшыў аб’ём працы, але навучыў цаніць час. Дырэктар у працы з кліентамі Андрэа Эчэверы адзначае, што маладое пакаленне спецыялістаў пераасэнсоўвае «культуру мітусні»: яны не адмаўляюцца ад інтэнсіўнай працы, але «перавызначаюць сам баланс». Будучы маці, яна бярэ ад чатырохдзённага тыдня максімум, прысвячаючы пятніцы сям'і ды асабістым справам.
Парада Курца іншым кіраўнікам — не абавязкова слепа капіраваць ягоную мадэль і рабіць пятніцы выхаднымі, але трэба сур’ёзна задумацца, чаму найлепшыя кадры павінны хацець працаваць менавіта ў вас. На ягоную думку, існуе здаровы кампраміс, пры якім у супрацоўнікаў застаецца паўнавартаснае жыццё, а ў заснавальніка — прыбытковы бізнес, які мае унікальную перавагу перад канкурэнтамі.
Релоцировались? Теперь вы можете комментировать без верификации аккаунта.