Кампанія прэзентавала новы фармат убудаваных аплікацый непасрэдна ўнутры чат-бота. Цяпер карыстальнікі змогуць выклікаць і выкарыстоўваць сэрвісы такіх кампаній, як Spotify, Booking.com, Figma, Coursera, Canva, не пакідаючы інтэрфейс. Распрацоўшчыкі атрымалі папярэдні доступ да Apps SDK — інструменту для стварэння такіх інтэграцый.
Кампанія прэзентавала новы фармат убудаваных аплікацый непасрэдна ўнутры чат-бота. Цяпер карыстальнікі змогуць выклікаць і выкарыстоўваць сэрвісы такіх кампаній, як Spotify, Booking.com, Figma, Coursera, Canva, не пакідаючы інтэрфейс. Распрацоўшчыкі атрымалі папярэдні доступ да Apps SDK — інструменту для стварэння такіх інтэграцый.
Аб’ява прагучала на штогадовай канферэнцыі распрацоўшчыкаў OpenAI DevDay 2025. Па словах генеральнага дырэктара Сэма Альтмана, мэта кампаніі — ператварыць ChatGPT у «супер-асістэнта, які дапамагае людзям быць прадуктыўнейшымі, вучыцца хутчэй і рэалізоўваць ідэі». Новыя ўбудаваныя аплікацыі, адзначыў ён, стануць «інтэрактыўнымі, адаптыўнымі і персаналізаванымі памочнікамі, з якімі можна размаўляць».
Цяпер ChatGPT зможа падключаць пабочныя сэрвісы проста ў дыялогу. Карыстальнік можа напісаць, напрыклад: «Figma, ператвары гэты накід у дыяграму» ці «Coursera, навучы мяне машыннаму навучанню», — і ChatGPT выкліча адпаведную аплікацыю. Калі хтосьці папросіць скласці плэйліст для вечарынкі, асістэнт аўтаматычна прапануе запусціць Spotify.
Сярод першых партнёраў — Zillow, чыя аплікацыя дазваляе шукаць кватэры на інтэрактыўнай карце, Canva, праз які можна ствараць і рэдагаваць дызайн проста ў чаце, і Expedia, якая прапануе браніраванне гатэляў і пералётаў. Падтрымка сэрвісаў Uber, DoorDash, Instacart, AllTrails, OpenTable і іншых чакаецца ў найбліжэйшыя месяцы.
OpenAI прапануе кампаніям ствараць уласныя ChatGPT-аплікацыі на аснове Model Context Protocol (MCP) — адкрытага стандарту, які дазваляе падключаць знешнія крыніцы дадзеных і адлюстроўваць інтэрактыўныя інтэрфейсы ўнутры чата. Некаторыя дадаткі змогуць нават узнаўляць відэа проста ў акне ChatGPT.
У будучыні OpenAI плануе ўкараніць сістэму манетызацыі аплікацый — у тым ліку праз функцыю Instant Checkout, якая дазваляе аплачваць тавары ці паслугі проста ў чаце.
Галоўны выклік новага фармату — абарона дадзеных карыстальнікаў. OpenAI заявіла, што распрацоўшчыкі абавязаны збіраць «толькі мінімальна неабходную інфармацыю» і быць празрыстымі ў пытаннях доступу да дадзеных. Аднак пакуль незразумела, ці атрымаюць знешнія аплікацыі доступ да ўсёй гісторыі дыялогу з ChatGPT або толькі да канкрэтнага запыту.
На думку экспертаў, OpenAI імкнецца ператварыць ChatGPT у паўнавартасную экасістэму — свайго роду «аперацыйную сістэму» новага пакалення, дзе ўсе сэрвісы аб’яднаны размоўным інтэрфейсам. Гэта крок у бок ад традыцыйнай мадэлі аплікацый і браўзераў, які аб’ядноўвае іх у адзінай інтэрактыўнай прасторы.
Рэлацыраваліся? Цяпер вы можаце каментаваць без верыфікацыі акаўнта.