Чарнагорыя збіраецца ўвесці візы для беларусаў

Чарнагорыя з’яўляецца афіцыйным кандыдатам на ўступленне ў ЕС. У сувязі з гэтым, паводле даных выдання, ёй неабходна правесці рэформы ў сферы візавай палітыкі, уключаючы выкананне правілаў, якія дзейнічаюць у Шэнгенскай зоне.

У прыватнасці, ЕС патрабуе ад кандыдатаў на ўступленне ўвесці візавы рэжым у дачыненні да грамадзян трэціх краін, якім неабходна атрымліваць візы для ўезду на тэрыторыю Еўрасаюза. Да такіх краін належаць, напрыклад, Беларусь, Расія, Кітай, Іран і іншыя.

Цяпер беларусы могуць знаходзіцца ў Чарнагорыі без візы цягам 30 дзён.

Між тым увядзенне віз для грамадзян Беларусі і Расіі можа мець негатыўны эканамічны эфект для Чарнагорыі, бо прывядзе да зніжэння плыні турыстаў, адзначае Dan.

«Увядзенне віз для грамадзян Расіі і Беларусі — гэта важны крок, але таксама і патэнцыйна адчувальны палітычны крок, які будзе мець далёка ідучыя наступствы для сацыяльных і эканамічных стасункаў Чарнагорыі з гэтымі краінамі», — адзначае выданне.

Застаецца верагоднасць таго, што Чарнагорыя будзе дамагацца канкрэтных дамоўленасцяў для асобных краін у ходзе перамоў аб уступленні ў ЕС. Аднак шанцы на тое, што ЕС пагодзіцца на нейкія выключэнні, адносна невялікія, лічаць у Dan.