На мяжы просяць адмовіцца ад карты паляка? Спыталіся ва ўладальнікаў D18

Вось пра якія кейсы нам расказалі:

• Мая жонка 4 ліпеня вярталася з Польшчы рэйсавым аўтобусам праз «Прывалку». 23.34, таму як звычайна яе адправілі на гутарку. Там паглядзелі тып візы (у жонкі — D18). Спыталіся, нашто ездзіла ў Польшчу (да мужа), за што яе судзілі, як ставіцца да Украіны і г. д. глядзелі тэлефон. Акрамя ўсяго іншага, гэтым разам папрасілі паказаць карту паляка. Супрацоўнік у цывільным сфатаграфаваў яе з двух бакоў і вярнуў. Пра тое, што ад яе варта адмовіцца, нічога не казаў. Усё доўжылася хвілін 10. Жонка кажа, што агулам усё карэктна было: маўляў, у іх такая інструкцыя — усіх, хто трапіў у базу, правяраць.
• Размаўляў са знаёмай, якая жыве ў Польшчы. Да яе мама з Брэста прыязджала 4 ліпеня, якраз з D18, па карце паляка. На мяжы ніхто не чапаў. Сястра штотыдзень ездзіць на закупы з D18 — таксама, кажуць, без праблем. 
• Езджу прыкладна раз на месяц на выходныя ў РБ, віза па карце паляка, мэта выдачы — 18. Праблем ані разу не ўзнікла. Апошняе перасячэнне мяжы — у ноч на 6 ліпеня, Брэст. Адводзілі на размову толькі людзей з украінскімі пашпартамі.

11 ліпеня набыў моц абноўлены закон «Пра грамадзянства Рэспублікі Беларусь». Згодна з ім, грамадзяне РБ абавязаныя на працягу трох месяцаў апавяшчаць органы ўнутраных спраў або дыпламатычную службу пра атрыманне замежнага грамадзянства, дазволу на жыхарства або іншых замежных дакументаў, якія даюць ільготы і прэферэнцыі «ў сувязі з палітычнымі, рэлігійнымі поглядамі або нацыянальнай прыналежнасцю». Да такіх дакументаў залічваецца і карта паляка.

— Гэтая інфармацыя збіраецца з некалькіх прычын, — сказаў начальнік Дэпартамента грамадзянства і міграцыі МУС РБ Аляксей Бягун. — У першую чаргу, [яна будзе выкарыстоўвацца] пры прызначэнні на дзяржслужбу або пасаду, праца на якой звязаная з прыналежнасцю выключна да грамадзянства Рэспублікі Беларусь і не дапускае ў асобы права на льготы і перавагі [у замежнай дзяржаве]. Акрамя таго, гэтая інфармацыя прызначаная для збору статданых, каб ацэньваць мабільнасць грамадзян і фармаваць адпаведную міграцыйную палітыку.

Мер адказнасці за парушэнне гэтай нормы пакуль не прадугледжана, але ў МУС папярэджваюць, што разам з МЗС ацэняць законапаслухмянасць грамадзян і ў выпадку іх нізкай актыўнасці знойдуць спосаб «прастымуляваць».

dev.by, як і іншым сумленным медыя, сёння вельмі складана: рэдакцыя працуе па-за межамі краіны, а нашыя рэкламныя даходы скараціліся ў некалькі разоў. Але мы даем рады — з вашай дапамогай. Гэта вы дзеліцеся з намі інфанагодамі, думкамі, досведам, часам і ўвагай. А 210 чытачоў падтрымліваюць нас данатамі.

У 2023 годзе мы хочам сабраць 1000 чытачоў-падпісчыкаў. 

Дапамагчы нам можна праз Patreon. 

З Беларусі — праз Donorbox.

І яшчэ крыптой, тут гаманцы.

Дзякуй, што прачыталі гэтае паведамленне.