Ciklum ліквідуецца ў Беларусі
Беларускі ІТ-рынак і Парк высокіх тэхналогій пакідае адзін з яго замежных піянераў — дацка-ўкраінскі распрацоўшчык Ciklum. Рэзідэнт ПВТ «Сіклум Бел», які ўваходзіць у міжнародную групу Ciklum, з гэтага чэрвеня знаходзіцца ў працэсе ліквідацыі, даведаўся Office Life. Статус юрыдычнай асобы пацвярджаецца інфармацыяй з АДР.
Ciklum была заснаваная ў 2002 годзе датчанінам Торбенам Майгаардам. Галоўным цэнтрам бізнэсу і распрацовак кампаніі з’яўляецца Украіна, дзе мінулым летам яна ўваходзіла ў пяцёрку найбуйнейшых айцішных працадаўцаў.
У 2006 годзе Майгаард адкрыў у Беларусі «Сіклум Бел». У 2007-м яна стала адным з першых замежных рэзідэнтаў ПВТ, а ў 2019 годзе ўваходзіла ў топ-50 ІТ-працадаўцаў Беларусі. Тады кампанія налічвала 171 супрацоўніка ў Беларусі і 3300 — у свеце.
У 2015 годзе кантрольны пакет Ciklum набыў створаны Джорджам Сорасам Ukrainian Redevelopment Fund. З завяршэннем ліквідацыі беларускай «дачкі» Беларусь зноў застанецца без багатага інвестара — ён ужо пакідаў краіну каля 25 гадоў таму, але ў статусе мецэната, а не бізнэсмена.
Вядомы амерыканец упершыню прыбыў у Беларусь у 1992 годзе, каб даць старт адукацыйным праектам свайго Фонду Сораса. Беларускі філіял пачаў працаваць з 1993-га, арганізуючы семінары для дырэктараў школ, лекцыі з запрашэннем навукоўцаў з ЗША, паездкі мясцовых навукоўцаў на сімпозіумы і стажыроўкі за мяжу. Фонд цалкам прафінансаваў Цэнтр прыватызацыі, які павінен быў дапамагчы мясцовым уладам у правядзенні раздзяржаўлення. Таксама ён стварыў і падтрымліваў такія праекты, як «Мас-медыя Цэнтр» і «Трансфармацыя гуманітарнай адукацыі».
На пачатку 1995 года ў Джорджа Сораса адбылася афіцыйная сустрэча з Аляксандрам Лукашэнкам. Бакі засталіся задаволеныя адзін адным, і на некаторы час нават наступіў рэнесанс для Беларускага фонду Сораса. Але ў 1997 годзе мільярдэр абвясціў аб спыненні ўсёй дзейнасці на тэрыторыі краіны.
Читать на dev.by