Cisco скарачае 4000 чалавек. Звольненым падораць курс па ШІ

Паводле звестак Reuters, скарачэнні закранулі менш за 5% штату Cisco і адбудуцца ў чацвёртым квартале. У 2025 годзе ў кампаніі працавала каля 86 200 чалавек. Як паведамляюць крыніцы, у развітальны пакет, акрамя выходной дапамогі і дапамогі ў працаўладкаванні, Cisco дадала год бясплатнага доступу да курсаў і сертыфікацый сваёй навучальнай платформы, у тым ліку па ШІ.

Расходы на рэструктурызацыю могуць скласці да $1 мільярда: прыкладна $450 мільёнаў Cisco прызнае ў чацвёртым квартале, астатнюю суму — у 2027 фінансавым годзе.

Генеральны дырэктар Cisco Чак Робінс растлумачыў перабудову неабходнасцю хутчэй перанакіроўваць рэсурсы на кірункі з самым высокім попытам. «У эпоху ШІ перамогуць кампаніі, у якіх ёсць фокус, аператыўнасць і дысцыпліна, каб пастаянна перанакіроўваць інвестыцыі ў галіны з самым высокім попытам і найбольшым патэнцыялам доўгатэрміновага стварэння вартасці», — заявіў Робінс.

Cisco заявіла, што будзе інвеставаць у мікрасхемы, оптыку, бяспеку і выкарыстанне ШІ супрацоўнікамі ўнутры кампаніі, адначасова скарачаючы ролі ў некаторых кірунках.

Фінансавыя паказчыкі кампаніі пры гэтым аказаліся мацнейшыя за чаканні экспертаў. У трэцім квартале, які скончыўся 25 красавіка, Cisco атрымала $15,84 мільярда выручкі супраць кансенсус-прагнозу аналітыкаў LSEG на ўзроўні $15,56 мільярда.

Галоўны драйвер — попыт на ШІ-інфраструктуру з боку найбуйнейшых воблачных правайдараў. Cisco ужо атрымала $5,3 мільярда замоваў на ШІ-інфраструктуру сёлета і павысіла чаканні па замовах за год да $9 мільярдаў з папярэдніх $5 мільярдаў.